Поглед

Мудри банки

Нина Нинеска-Фиданоска

Никој не е како нашите банки. Полни со пари, стегнати за кредити, бавни кога треба да ги намалат каматите и брзи кога треба да ве потсетат дека им должите пари! Се чини дека тие најубаво си ги наредија коцките во целиот период додека светот го тресеше економската криза, а огромни светски реномирани банки пропаѓаа и молеа за државна помош.

Иако заслужуваат најголеми пофалби што успеаја да им одолеат на сите предизвици, и не само што не пропаднаа туку и остварија какви-такви профити во страшната 2009 година, сепак, прашање е како само им успева да им оди добро, додека сите други тонат во очај и беспарица. И фирмите, кои, едноставно, молат за кредити и успеваат да ги добијат само со помош на „трикови и црни магии“, и граѓаните, кои никако да дојдат до пристојни камати за нивните заеми и „истоштени“ картички во кои се заглавени до гуша.

Сигурни играчи се нашите банки. Секоја среда својот вишок пари ги замрзнуваат преку благајнички записи во Народна банка на Македонија, добивајќи за тоа сосема пристојна камата од 6,5 отсто. Ем камата ем не ги боли глава дали денарите ќе им бидат вратени, бидејќи централната банка обезбедува стопроцентна сигурност. Зошто банкарските службеници да се расправаат со некојси таму „сомнителни“ фирми или граѓани, па да се мачат да им ги читаат бизнис-програмите или барањата за кредит, па да ги проверуваат..., и на крај, во грч да чекаат дали овие, кориснициве, ќе ги враќаат ратите. Па што дека од нив ќе добијат повисоки камати, тоа и не е толку важно за нашите банки, битно е да се игра на безбеден терен! Сосема легитимна е одлуката на банкарите како тие ќе ги вложуваат своите средства.

Веројатно, така бараат нивните газди. Но, мисли ли некој за економскиот развој на својата држава или, сепак, поважна е сопствената комоција?