Сеча во скопска Апелација

По Дума, вчера Судскиот совет одлучи да ги суспендира и останатите четворица судии

Гордана Дувњак

Судскиот совет го десеткуваше Кривичниот оддел на скопска Апелација, по нивната вчерашна одлука за суспензија на целиот Кривичен совет, што одлучувал за случајот со турскиот државјанин со двоен идентитет.

По апелационата судијка Виолета Дума( од која почна), до конечната одлука на Советот дали ќе ја разреши судската петорка, предметите ќе им бидат одземени од работа и на останатите четворица судии: Владо Џилвиџиев, Мирјана Дуковска, Катерина Оровчанец и Исмаил Лимани.

Тоа најверојатно ќе се случи веќе в понеделник, по добивањето на решението од Судскиот совет, кога судиите ќе треба да ги отстапат старите предмети, нема да им се доделуваат нови во работа и нема да бидат вклучени во совети или во други активности.

За претседателот на Судскиот совет Васил Грчев, кој ја поведе постапката за утврдување одговорност и за останатите членови на Кривичниот совет, станува збор за принципиелна одлука.

„Исто како и во случајот со судијката Дума, која претседаваше со Кривичниот совет, сметаме дека има елементи на незаконско постапување и кај останатите судии“, додава тој.

Со ваквиот став не се согласува првиот човек на скопска Апелација, Јордан Митриновски, кој смета дека неосновано се води постапка за петмина негови колеги.

„Второстепениот суд не е идентификационен суд и секој што учествувал во работата на второстепен суд кој одлучува по жалби точно знае како се води постапка и што се одлучува на јавна седница“, нагласува Митриновски. Тој вели дека дури и да имало некакви сомневања околу идентитетот на осуденото лице, во секое време може да се донесе решение со кое ќе се направи исправка на генералиите во пресудата.

Митриновски е убеден дека неговите колеги постапиле правилно и законски, особено затоа што лицето е фатено на самото место при правењето кривично дело, па дури и да не се знае неговиот точен идентитет, сепак, тој мора да оди на издржување на казната.

Раководителот на скопска Апелација не крие дека е многу загрижен, бидејќи со вчерашната одлука на Судскиот совет останува само со еден Кривичен совет што ќе одлучува во петорка за тешки кривични ��ела и за оние од организиран криминал. Тој вели дека е доведено во прашање нормалното функционирање на целиот суд.

„Во Кривично имаме девет судии што се распоредени во три совети во тројки и два совета составени од петорки. Како десетти член во втората петорка е судијата Ангел Величковски, кој работи на прекршоци. Со ваквата одлука на Советот надвор од сила се става цела петорка, а секојдневно има предмети за пресудување,одлучување по притвори. Не ќе можеме да ги остваруваме ниту посетите ниту контролите на основните судови“, додава Митриновски.

Вели дека посакува што поскоро да заврши целата постапка и да се прекине неизвесноста,бидејќи не може ад хок да се префрлаат специјализирани судии од Граѓанскиот оддел, што треба да одлучуваат за тешки предмети од кои некои се за доживотен затвор.

Судскиот совет и вчера не избра уште еден апелационен судија во скопска Апелација, бидејќи исто како и за битолскиот второстепен суд, ниту еден од пријавените кандидати не го доби потребното мнозинство. Советот одлучи по петти пат да го повтори конкурсот и за претседател на струмичкиот суд. На вчерашната седница за нови судии во Основниот суд Скопје 2 беа избрани тројца завршени академци: Улбер Хасани, Гордана Билевска и Софија Спасовска. Стручната соработничка од скопска Апелација Александра Ристевска е избрана за судија во скопскиот Кривичен суд, а Ѓорѓи Андонов за Основниот суд во Штип. Вчера е разрешен и еден судија од судот во Свети Николе, судија од струмичкиот суд е суспендиран, а за еден кумановски судија е поведена постапка за разрешување.