Гостиварската болница остана без покрив

Лимениот покрив беше разнесен од силниот ветер

Киро Кипроски

Гостивар - Силен ветер го разнесе покривот на гостиварската болница. За среќа, нема жртви, ниту повредени, но е причинета голема материјална штета на болницата. Лимот оштети и патничко моторно возило, сопственост на вработен, кое било паркирано крај болницата. Болните и персоналот на детското одделение веднаш биле евакуирани.

Лимениот покрив на гостиварската болница беше разнесен од силниот ветер што дуваше со голема брзина. Покривот бил откорнат половина час по полноќ, меѓу петокот и саботата.

„Ударот беше страотен, не' фати паника, помисливме дека е земјотрес“, ни зборуваа пациентите и медицинскиот персонал што се наоѓале во детското одделение.

Директорот на болницата, д-р Ферид Муча, вели дека лимениот покрив што бил поставен пред десетина години на трактот на петтиот кат, силниот ветер го откорна и го разнесе на сите страни. Дворот беше преполн со парчиња на стаклена волна, летви, лим, а целата кровна конструкција со лимот падна на трактот, кој е со рамна плоча и има три ката, а на третиот е сместеното детското одделение.

„Паниката меѓу болните и персоналот брзо се смири и сите болнички одделенија и служби почнаа да функционираат нормално и да ги извршуваат работите“, вели директорот Муча. Тој додава дека проценители на осигурителна компанија почнале со утврдување на причинетата штета.

Министерот за здравство, Бујар Османи, кој завчера ја посети гостиварската болница, беше вчудоневиден од глетката. Во изјавата за медиумите истакна дека во најбрз можен рок ќе биде поставен нов покрив, со што би се спречиле евентуални штети од дожд , снег и од други временски неприлики. Во санацијата на покривот ќе биде ангажирана градежната фирма што ги извршува работите на реконструкцијата на инфективното одделение на гостиварската болница и која треба да ја обнови фасадата на целата болница. Уште во текот на посетата на министерот, градежниците почнаа со отстранување на остатоците од покривот. Како што потврди Османи, експерти на Министерството извршиле увид на штетите и се ангажирани да изготват план за санација.

Според истражните органи, материјалната штета се проценува на над 20.000 евра. Ветерот разнесе покривна површина од околу 800 квадратни метри и околу четири тони лим, при тоа беше искршено стакло на седум прозорци на детското одделение.

Ветерот што ноќта меѓу петокот и саботата беснееше во Гостиварско нанесе штети на покривите на многу индивидуални куќи, на ниско напонската електрична мрежа, па Гостивар и повеќе селски населби во Горни Полог останаа без електрично напојување, а беа искинати и кабли на кабловската телевизија.