Иако летото календарски е на крај, жештините не попуштаат
Жешкото лето со екстремно високи температури се' уште не ја напушта Македонија. Иако е невообичаено за овој период од годината, живата во термометрите викендот ќе се искачи близу четириесеттиот Целзиусов степен. Дневната температура денеска ќе го достигне 38, а утре 39 Целзиусови степени.
Синоптичарите најавуваат благо опаѓање на температурите и извесно освежување од вторник и среда, кога во земјава ќе има прилив на посвежа маса што ќе пристигне од северозапад.
Денеска и утре Македонија ќе биде под влијание на топла и стабилна воздушна маса, која условува сончево и топло време со температури од 31 до 39 степени.
„Сончево и топло ќе се задржи и в понеделник, а од вторник и среда поради прилив на малку посвежа маса од северозапад се очекува на да настапи благ пад на температурите на воздухот со услови за локална нестабилност и можност за врнежи од дожд и грмежи. Ќе дува умерен северозападен ветер“, вели Костадинка Арсовска, дежурен синоптичар во Управата за хидрометеоролошки работи.
В четврток и в петок ќе настапи преодно стабилизирање на времето со благ пораст на температурите. Кон крајот на седмицата повторно ќе има дестабилизирање на атмосферата и ќе преовладува променливо и посвежо време со повремени врнежи од дожд. (Сн.К.)
