Згаснуваат „Време“, „Шпиц“ и „Коха е ре“

Згаснуваат весниците „Време“, „Шпиц“ и „Коха е ре“. Оваа вест вчера ја објави А1 телевизија, според која, трите медиуми и телевизијата од Управата за јавни приходи добиле решенија за присилна наплата на наводен затаен данок - од 10, 5 милиони евра. Девет и пол милиони евра од вкупниот износ е долг на А1 телевизијата, а еден милион на „Плус продукција“, куќата што ги издава споменатите весници. А1 објави дека денешните броеви на „Време“, „Шпиц“ и „Коха е ре“, најверојатно, се последни. Според информациите објавени на А1 , „издавањето ќе запре поради недостиг од материјали за печатење и неможноста да се купат. Повеќе од стотина луѓе ќе останат на улица. Истата судбина ја чека и А1 телевизија. УЈП стартуваше со присилна наплата на парите од сметката на телевизијата, што е веќе блокирана од судот за два милиона евра. Од денеска сите парични приливи на медиумот ги презема државата. Доколку не успее да ги наплати во пари, по истек на 45 дена како доверител Управата може да побара отворање стечај за телевизијата. Во меѓу��реме, УЈП не смее да го попречи работењето на медиумот со одземање движен и недвижен имот потребен за функционирање на телевизијата“.

Од А1 телевизија велат дека ова е последен, најсериозен удар на државата врз критички настроените медиумите од „Перо Наков“ и дека притисокот започнал уште пред повеќе од половина година, со координиран упад на повеќе државни служби и полицијата во медиумите. Потоа следуваа апсења на сопственикот на телевизијата, Велија Рамковски, дел од неговото семејство и управителите на неколку фирми. Рамковски и уште 22 лица се товарат за злосторничко здружување, перење пари, злоупотреба на службеното овластување, даночно затајување и оштетување на доверители. Рамковски е во притвор од 23 декември минатата година. Во притвор судењето го чекаат уште седум лица, другите се во куќен притвор, а дел се на слобода. (П.Р.)