ВМРО-ДПМНЕ најде четири причини да каже „не“

Дел од партиското раководство инсистиралo да се прифатат изборите само „за да се порази Бранко“

Светлана Унковска


Под превез на целосна тајност, завчера во доцните ноќни часови, помина седницата на Извршниот комитет на ВМРО-ДПМНЕ, на која падна и конечна одлука - предвремени избори ќе нема. Со оваа одлука премиерот и лидер на ВМРО-ДПМНЕ, Никола Груевски, и партиското раководство го одбија барањето на лидерот на СДСМ, Бранко Црвенковски, кој во неделата побара предвремени избори во име на опозицијата.

Иако околу одлуката на ВМРО-ДПМНЕ се создаваше атмосфера на голема неизвесност, извори блиски до партиското раководство велат дека седницата била само обична фарса, бидејќи на сите им било сосема јасно оти Груевски нема да ја прифати фрлената ракавица за изборен мегдан. Дел од партиското раководство и тоа помладите членови инсистирале да се прифатат изборите само „за да се порази Бранко и со тоа докрај да се делегитимира“. Но, Груевски, иако рекол дека оваа идеја со задоволство би ја прифатил, сепак, промената на силите во парламентот не му се допаѓала.

Според упатените, и покрај тоа што избори во овој момент на ВМРО-ДПМНЕ, веројатно, би и' обезбедиле уште еден четиригодишен мандат, Груевски е свесен дека партијата не би го обезбедила мнозинството што сега го има. Во таков случај многу одлуки ќе зависат од коалицискиот партнер ДУИ, а ВМРО-ДПМНЕ нема да биде во комотна состојба како што е сега. Натамошното партнерство со ДУИ ќе потпадне под силен политичкиот пазар, а почнатите проекти би можело да бидат условувани и на тој начин и блокирани.

Директорот на Центарот за комуникации, Илија Димовски, наведува четири аргументи поради кои била донесена одлуката предвремени избори да нема. „Во нормалните демократски држави предвремени избори има кога не функционира системот, што во Македонија не е случај. Имаме Влада што има не апсолутна, туку двотретинска поддршка во Собранието, а коалициските односи функционираат добро. Како второ, значително не би се сменил соодносот на силите во Собранието, а истовремено ќе се изгубат многу време, енергија и пари“, вели Димовски и додава дека на овој став биле и коалициските партнери од „За подобра Македонија“ и владиниот партнер ДУИ.

„Оценивме, исто така, дека барањето на опозицијата е блеф за внатрепартиска употреба за пред своето членство да се претстават дека се многу силни, а оти ние сме слаби и дека се сака да се дефокусира вниманието на јавноста од аферите ’Надеж и ’Перо Наков’. И на крај констатиравме дека никој не може да ни гарантира дека потоа СДСМ повторно нема да бара избори и така би влегле во еден маѓепсан круг“, истакнува Димовски. Тој вели дека на седницата на ИК, сепак, имало дилеми дали да се прифатат избори или не и дека биле разгледувани „добрите и лошите ��трани на двете форми“, но на крај, сепак, едногласно била донесена одлука да не се оди на избори. „Оценивме дека подобро би било да нема избори, бидејќи имаме многу проекти што се почнати и треба да се завршат. Изборите нема да променат ништо, само ќе ги одложат сите активности и ќе ги забават економските процеси“, смета Димовски.

Во иста конотација е и партиското соопштение издадено веднаш по завршувањето на седницата на Извршниот комитет. Во него се наведува дека приоритет на партијата е борбата против криминалот и корупцијата, справувањето со последиците од светската економска криза и напорите за реализација на евроатлантските аспирации. За ВМРО-ДПМНЕ било неприфатливо „со блефирањето и покерашкиот пристап во политиката на Црвенковски целосно да се дефокусира енергијата насоч��на кон спроведување на програмата“.