Во Ново Лисиче кај терминалот на автобуските линии број „5“ и „15“ стартуваа градежните зафати за изградба на фекалната канализација во Горно Лисиче. Мрежата ќе минува по новопроектираниот булевар „АСНОМ“ . Реализацијата на проектот ќе чини 18 милиони денари, а средствата се издвоени од градскиот буџет. Изградбата треба да заврши за три месеци, а стартот на работите свечено ги означи градоначалникот на Скопје, Коце Трајановски, и градоначалникот на Општина Аеродром, Ивица Коневски. На изградбата на фекалната мрежа ќе работат екипите на фирмата „Енергомонт“ од Скопје.
Овој капитален инфраструктурен ќе се протега на околу 1.200 метри, а ќе има профил на цевки од 500, 600 и од 1.000 милиметри. Како што рече градоначалникот Трајановски, од изградбата на колекторот корист ќе имаат околу 30.000 граѓани од населеното место Горно Лисиче. Трајановски додаде дека во иднина се планира изградба на пречистителна станица од левата страна на Вардар кај селото Трубарево. Градоначалникот на Аеродром, Коневски, пак, изрази надеж дека за дваесетина дена паралелно со изградбата на колекторот ќе започне и изградба на препумпна станица. Реализацијата на двата проекта ќе го реши проблемот со септичките јами. (Сн.К.)
