Цветанов отиде со „доказите“ кај Шврговски

Директорот на Управата за спречување перење пари ќе поднесе оставка ако нема криминал во доказите

Катица Чангова

Судирот меѓу Управата за спречување перење пари и Антикорупциската комисија ја достигнува точката на вриење. Отровни стрели меѓу првите луѓе на двете институции фрчеа и вчера, а се најавија оставки од функциите и тужби за клевета.

Ване Цветанов ќе понесе одговорност и ќе замине од директорската позиција на Управата за спречување перење пари доколку државниот јавен обвинител Љупчо Шврговски не пронајде поврзаност меѓу притисокот за негова оставка и доказите за организиран криминал тешки повеќе од 120 милиони евра.

Седум кутии со документи вчера достави Цветанов во Јавното обвинителство за да докаже дека институцијата со која раководи работи на десетина крупн�� предмети поврзани со перење пари и финансирање тероризам, но и дека нема да отстапи од стегање на обрачот околу организираните мафијашки криминални структури.

„Овие предмети се работат со месеци и со години. Во нив има звучни и моќни имиња, а токму оттаму доаѓа притисокот. Лошото е тоа што во организираниот криминал понекогаш на кукавички начин се кријат организирани криминалци под превезот на одредени политички партии“, потенцира директорот на Управата за спречување перење пари, но одби да се впушта во давање повеќе детали.

Директорот Ване Цветанов повторно го нападна првиот човек на Антикорупциска, Илми Селами, за тенденциозност и за настојчивост во туркањето постапка за негово разрешување. Притоа, кажа дека не е виновен и дека не направил никакви пропусти, а дека и до Јавното обвинителство ќе ги достави документите за вработување што ги потпишал тогашниот министер за финансии, Трајко Славески.

„Претседателот на Антикорупциската комисија упорно форсира нешто што го нема и сака да отсече нечија глава без факти и докази. Мотивите не ми се познати“, подвлече Цветанов, посочувајќи дека Селами дури лицитирал со мнозинството антикорупционери.

Притоа, Цветанов на индиректен начин го поврза Селами со криминалните структури за кои Управата води предмети, изразувајќи надеж дека обвинителот ќе направи нешто околу тоа. „Ние сме административен орган. Имаме индиции кои упатуваат на таква евентуална поврзаност. Не можам да кажам ни да ни не. Обвинителот ги има сите инструменти да го поврзе тоа и да го докаже“, додаде директорот на Управата.

Државниот јавен обвинител, Шврговски, во изјава за „Утрински весник“ потврди дека вчера разговарал со Цветанов, кој го информирал за работата на крупни предмети, но и за случајот што го отворила Антикорупциската комисија.

„На Обвинителството му се потребни неколку месеци пред да се изјасни дали доставените докази се доволна основа за истражна постапка“, објасни Шврговски. Што се однесува до постапката за Ване Цветанов, која ја водат антикорупционерите, Шврговски рече дека тоа не е во негова ингеренција и дека не може да се меша во работата на оваа институција.

Како што е веќе познато, Државната комисија за спречување корупција го обвини Ване Цветанов дека во неговата институција биле вработени 29 лица без согласност од Министерството за финансии. „Ако Цветанов имал потреба за 29 привремени вработувања, тогаш зошто не ги реализирал по редовен пат, онака како што пропишуваат законите. Тој манипулира, а неговите докази не се доволни за да не' уверат во придржување на процедурата“, изјави вчера Илми Селами, нагласувајќи дека директорот на Управата за спречување перење пари е печен за разрешување. Селами откри дека тројца членови на Антикорупциска гласале за иницијативата сметајќи дека доказите на Државниот завод за ревизија се доволни. Конечниот став по предметот ќе го изградат наредната седмица откако во директен контакт со ревизорите ќе добијат сознанија за законитоста на постапката. Шефот на Антикорупциска демантираше каква било тенденциозност во постапувањето за случајот на Ване Цветанов, кој не е единствен предмет кај нив. „Каде би ни бил крајот ако е така. Но, човечки инстинкт е да се брани“, нагласи Селами, мислејќи на Цветанов.