Баросо: Време е Македонија да донесе одлука

Претседателот на Европската комисија, Жозе Мануел Баросо, вчера по средбата со македонскиот претседател Ѓорге Иванов, порача дека е време да се донесе одлука во врска со прашањето за името, но не заборави да повтори дека за пристапните преговори со Македонија е неопходна консенсуална одлука на Европскиот совет.

„Во последниот период постои подобрување на климата во разговорите меѓу Ск��пје и Атина и волја кај двете страни за надминување на спорот. Јас ја разбирам екстремната чувствителност по ова прашање, но ги повикувам сите страни да ја решат оваа пречка што е можно побрзо. Време е да се донесе одлука. Сега е време да се одлучи во врска со ова прашање за името“, порача Баросо, кој од македонскиот претседател побара задржување на темпото на реформите.

Иванов по средбата, истакна дека Македонија е конструктивен фактор и партнер во разговорите, но дека претстојниот период очекува од Грција да се однесува европски за да се надмине овој билатерален, и како што истакна, ирационален спор.

„Овде сум како претседател на држава во која евроатлантските интеграции се врвен приоритет, со плебисцитарно изјаснување на граѓаните во поддршка на европската иднина на Македонија. Затоа, искрено верувам дека препораката што ја дадовте наскоро ќе резултира и со датум за започнуваме на преговорите“, рече претседателот Иванов. Македонскиот претседател, кој во Брисел е заедно со министерот за надворешни работи, Антонио Милошоски, денеска ќе оствари средби и разговори и со претседателот ��а Европскиот совет, Херман Ван Ромпуј. (П.Р.)