Случајот „Телеком“ кај Обвинителството
Случајот со злоупотребите во „Македонски телеком“ направени во периодот од 2005 до 2006 година е во рацете на Обвинителството. Полицијата завчера поднесе кривични пријави против четворица странски државјани, поранешни директори во „Македонски телеком“ поради сомневање дека проневериле приближно четири милиони евра. Според пријавата, тие склучиле неколку договори со кипарската фирма „Чаптекс холдингс лимитед“ за наводни консултантски услуги, кои никогаш не биле реализирани.
Обвинителството во наредните денови треба да одлучи дали ќе поведе постапка против поранешните директори Атила Сендреи (56) од Унгарија, Роуф Плат (42) од Германија, Михаил Кефалојанис од Грција и Золтан Кишиуш од Унгарија поради злоупотреба на 3.975.000 евра, за кои биле оштетени акционерите во „Телеком“, меѓу кои и Владата како сопственик на 47 проценти од акциите. Доколку се оцени дека има основи за сомневање за направени злоупотреби, ќе биде отворена истрага, на која свои изјави за обвинувањата ќе треба да дадат и четворицата директори, по кои во тој случај би можела да биде распишана и меѓународна потерница. |
