Мислења

Груевски вресна: врати се, Бранко

Кире Наумов

Ако некој порано имаше каква било дилема, денес е сосема јасно дека без Црвенковски, Груевски и ВМРО-ДПМНЕ ја губат суштината за нивното постоење на политичката сцена во Македонија

Не цели три месеци по Конгресот на СДСМ, расчистена е една голема недоумица. Многумина се излажале ако мислеле дека најразочарани од заминувањето на Црвенковски од лидерската позиција се приврзаниците на конгресниот Иницијативен одбор за негово останување, блиските негови луѓе од претходното раководство на СДСМ или, пак, можеби „Бранковите олигарси“. Оној кој целосно го изгубил раатот по 2 јуни и заминувањето на Црвенковски од политичката сцена е баш Никола Груевски. Неговото разочарување од таквиот исход на последниот Конгрес е забележливо од првиот ден, но деновиве тоа ја доживува својата кулминација. Тој е единствениот кој отворено излегува на јавен настап со транспарент: врати се Бранко. И ако некој порано имаше каква било дилема, денес е сосема јасно дека без Црвенковски, Груевски и ВМРО-ДПМНЕ ја губат суштината за нивното постоење на политичката сцена во Македонија. Притоа, станува сосема неважно дали Груевски навистина мисли дека сега ќе си има работа со своите стари муштерии, како што ги нарече Заев и Шеќеринска. Проблемот е што повеќе ниту тој ниту неговата инсталирана медиумска армада го немаат параванот наречен Црвенковски зад кој можеа да се кријат додека го одеа походот за разнебитување и уназадување на оваа држава.

А мораме да се согласиме дека не е лесно под притисок на свежиот воздух во Маврово - Ростуше да смислиш како ќе ја дефокусираш јавноста која се фатила таму за некојаси Фиренца. Безобразни се и Жерновски и тој советник кој решил да поставува такви глупави прашања околу патувањата врзани за „Скопје 2014“. Во принцип, не е глупаво прашањето, туку одговорот кој во себе содржи цифра од над милион евра. Има и други кои поставуваат такви прашања, на пример, околу трошоците за планетарните патувања наречени „роуд-шоуа“. Чинам последен кој му текна да прашува такви глупости беше лидерот на ЛП, Ивон Величковски, кој безобразно се дрзна на последната седница за пратенички прашања лично да го запраша премиерот колку буџетски средства се потрошени за овие патувања. Е ама тука одговараше самиот Груевски, кој изнакажа се' и сешто како по обичај, ама бројка никако. Но, еден ден на тоа прашање ќе одговара некој друг, и исто како во Центар, ќе ја слушнеме точната бројка. Дотогаш и Величковски и целата јавност можат само да прогнозираат. По „јавувањето за Фиренца“, станува многу полесно. Јас би одел кај роуд-шоуата со мултипликатор (коефициент) 50 во однос на Фиренца.

Но, сите велат дека е ова само почеток. Дека како печурки по дожд секојдневно ќе почнат да се појавуваат податоци за по неколку милиончиња народни пари расфрлани за аскетскиот живот на скромните вмровски фунционери и надворешните бранители на каузата кои, нели, ни кафе не пијат на туѓа сметка. И знаејќи го ова, очигледно Груевски за кратко го одложува јавувањето кај Црвенковски со цел да му го побара говорот по повод аферата „ТАТ“, кој сега треба да е со работен наслов „ниту ВМРО ниту свети ВМРО“, и решава да му даде продолжено доживување на својот акт од Мечкин Камен. Ако за таму мислевме дека делот од говорот во кој се упати порака дека доаѓа времето еднаш засекогаш да се расчисти со предавниците и антидржавните елементи е само недостаток на инспирација како реалноста да се фарба во розово, Маврово - Ростуше покажаа дека планот е одамна направен. Ако на тоа ги додадеме и хистеричните крикови на медиумско-интелектуалната армада, која ја креваше тензијата од Илинден, па до денес, мораме да заклучиме дека влегуваме во најинтересната фаза на политичка разврска во последните осум години.

Како што напоменав и погоре, политичкото опстојување на Груевски и ВМРО-ДПМНЕ е една голема шуплина без постоењето на Црвенковски како политички антипод. Од таа причина џуџестите гебелсчиња цела недела преку своите медиуми не' потсетуваа на го��орот на Црвенковски во кој тој вели дека и до мај и по мај, та бил та не бил претседател на СДСМ, ќе си имале работа со него. Тие само го подготвуваа теренот за Груевски во саботата да вресне: врати се Бранко, а ако не сакаш, јас ќе те вратам. Груевски игра по нервите на Црвенковски. Се обидува по којзнае кој пат да го погоди директно во неговото его и да го натера да излезе и јавно да каже дека - да, тој се' уште редовно менува хемија со СДСМ и го одржува своето ДНК внатре. Но, настаните како оној околу „Бристол“, а посебно бројката околу Фиренца, колапсот на буџетот и „зарибаната“ економија, го прават крајно нервозен и нетрпелив. Тој јавно порачува, или ти Бранко ќе излезеш и сам ќе кажеш дека ја кочиш Комисијата околу 24 декември (со што Груевски ќе се релаксира и ќе има политички материјал за мелење до крајот на годината) или, пак, ќе размислел за нови чекори и нови стратегии кои ќе бидат сосема различни од она што е сега.

Е сега е она најважното, а тоа е прашањето што можат да бидат евентуалните нови чекори и нови стратегии. Тука некаде треба да се бара начинот околу тоа како Бранко може да биде вратен иако тој не сака. А сосила на човек можеш само да му земеш, а не и да му дадеш. И бидејќи кај нас најпрво за се дознава чаршијата, а оваа власт и нејзе ја користи за спинување, се' почесто се шпекулира дека пробивањето на полицискиот кордон на 24 декември може правно да биде третирано на многу начини. А кој го предводеше пробојот? Има ли основа предводникот оттогаш да биде и предводник на оние што „ќе одговараат пред легалните судови за креирање услови на граѓанска војна, за преврати и слични насилнички дејства“, како што ни најавија бранителите на каузата. Е ако случајно тоа се новите чекори и стратегии, тогаш Црвенковски сигурно ќе биде вратен во политичкиот живот во Македонија, ама воедно тоа ќе биде и најхазардерското играње со оган на оваа власт.

Како и да е. Црвенковски е сосема неважен за актуелниов момент и е алатка за дефокусирање. Нервозата кај властодршците постои само затоа што СДСМ и опозицијата цврсто се решени дека извештајот за 24 декември може да содржи во себе се' и сешто, но со него мора да се оспори легалноста на седницата која беше одржана под присмотра на полициските сили и без јавност. Тоа ќе ги проблематизира носењето на буџетот и законот за гаранции, односно задолжување. А тоа многу ќе боли.

П.С. Неизбежно морам да повторам за некои читатели и колумнисти-коментатори на моите колумни, нешто што е општо познато. Хомосексуалец е сексуална определба, а педер е карактерна особина. И едните и другите постоеле од памтивек. Човештвото, воопшто, а и Македонија, немале никаков проблем од првите. Сите проблеми и дереџето на кое сме дојдени е поради оние вторите. Таквите најчесто ја користат доктрината која во безбедносно-разузнавачките речници се вика лажни фортификации. Се надевам дека нема да имам потреба наредната колумна да ја објаснувам оваа доктрина, која е широко прифатена од нашите педери.

(Aвторот е член на СДСМ)

Наш став



Објавувањето колумни и мислења од надворешни автори е одраз на намерата на „Утрински весник“ да биде влијателен глас на заедницата. Но, напоменуваме дека не се согласуваме секогаш со ставовите што ги изнесуваат нашите колумнисти, особено кога станува збор за лични дисквалификации, етикетирања без основа и извртување на контексти со цел да се наштети на други личности од која било сфера. „Утрински“ се оградува од таквиот речник и конотации и ги смета за непримерни во јавната комуникација.