Димовски чекор до медал на СП

Примислав Димовски се проби меѓу најдобрите осуммина боксери во супертешка категорија (над 91 кг.) на 15. Светско првенство што се одржува во Милано од 1 до 12 септември. Единствениот преостанат македонски претставник од четворицата што се појавија на мундијалот во Италија во второто коло го декласира Клејтон Лорент од Девствени Острови со 12:0, по рунди 4:0, 6:0 и 2:0.

Следен противник на популарниот Прим попладнево ќе му биде Кинезот Жилеи Жанг, кој досега ги совлада Сардор Абдулаев од Узбекистан со 11:5 и Ерик Пфајфер од Германија со 12:8. Победникот од македонско-кинеската пресметка ќе обезбеди медал, а последна пречка до финалето ќе му биде подобриот од четврт-финалниот дуел меѓу Украинецот Роман Капитоненко и Кубанецот Ерисланди Котилја Савон.

Димитар Ташков, пак, на стартот во тешка категорија до 91 кг. беше нокаутиран од Рамзјон Ахмедов. Узбекистанецот ја доби првата рунда со 14:6, а работата ја заврши по 47 секунди од втората, до кога освои уште три поена. (Р.Д.)