Ограбена црквата во Ташмаруништа

Непознато лице, меѓу 30 август и 5 септември, провалило во црквата „Свети архангел Михаил“ во струшкото село Ташмаруништа и, притоа, украл девет икони и две позлатени царски порти. Според СВР-Охрид, провалникот најнапред го скршил катанецот од влезната врата, а потоа ја искршил металната прачка што ја потпирала вратата, по што влегол внатре во црквата.

Полицијата извршила увид, но материјалната штета дополнително ќе се утврдува, бидејќи одземените икони потекнуваат од 19 век и имаат голема културно-историска вредност.

Ова е втора кражба во црква во Струшко за кратко време. Имено, меѓу 23 и 27 август беше ограбена и црквата „Света Богородица“ во селото Долна Белица. Тогаш беа украдени два сребрени крста, еден појас од „Св. Богородица“ долг речиси еден метар и дваесетина икони со различни димензии. (Љ.С.)