Вештаците во судница ќе ја оценуваат состојбата на Бајруш Сејдији

Експертскиот тим, предводен од професор Здравко Чакар, ќе присуствува на утрешното рочиште на обвинетите за случајот „Пепел“. Ова е одлука на Судскиот совет по долгото натегање со одбраната на првообвинетиот Бајруш Сејдији. Имено, пред започнувањето на понеделничкото судско рочиште, на бранителите на Сејдији и на јавниот обвинител им беше предаден вештиот наод и мислење на тимот експерти од Институтот за судска медицина и криминалистика.

Јавниот обвинител го толкуваше добиеното вештачење и, според него, не постојат никакви пречки Сејдији да го следи натамошниот тек на судскиот процес, но затоа, пак, адвокатот Саво Коцарев побара тримесечни лекување за својот клиент.

Со оглед на тоа што не можеше да се постигне согласност околу здравствената состојба на Бајруш Сејдији, судот донесе решение со кое тимот лекари ќе присуствува на утрешното судско рочиште на кое ќе даде одговор за состојбата на Сејдији. (Љ.С.)