Гордана Михаилова-Бошнакоска пишува песни-слики

Во КИЦ беше промовирана најновата поетска збирка „Докази“ од оваа поетеса

Во Културно-информативниот центар вчера беше промовирана најновата поетска збирка под наслов „Докази“ од истакнатата македонска авторка Гордана Михаилова-Бошнакоска.

Гордана Михаилова-Бошнакоска живее и работи во Скопје. Беше новинар и уредник во Македонска телевизија, каде што подготвуваше емисии од областа на културата, уметноста и документаристиката. Со пишување поезија почнала во најраната младост, а подоцна проза. За нејзиното творештво се искажале повеќемина литературни критичари, теоретичари и писатели. За поетската книга „Планини од картонски кули“ ја доби наградата „Браќа Миладиновци“ за 1998 година на Струшките вечери на поезијата. Автор е на книгите „Писма“, поезија, „Толкување на морето“, поезија, „Босфорско лето“, проза и други.

„Докази“ е деветата поетска книга на Гордана Михаилова-Бошнакоска. Песните од оваа книга се, всушност, доказ за постанокот на песната и оттаму целата книга насловена како „Докази“, а издавач е „Матица македонска“ од Скопје. Книгата ја промовираше проф. д-р Лидија Капушевска Дракулевска, која нарекувајќи ги песните на поетесата песни-слики ја долови суштината на поезијата на Михаилова-Бошнакоска. Нејзините песни навистина личат на подлошка за сценарио и на читателот му даваат целосна слика за нештата. „Отсекогаш музиката сум ја сметала дека е пред се' и над се'. И мислам дека ние поетите и писателите кога пишуваме само навидум досегнуваме до некои висини, но никогаш не можеме да допреме до оние места до кои допира музиката“, рече Гордана Михаилова-Бошнакоска. Стихови од збирката читаше актерката Сабина Ајрула Тозија, најновата песна ја прочита самата авторка, а за музичкиот дел од програмата беше задолжена Мерсиха Шукри, харфа. (Н.П.)