Зонско паркирање кај „Мавровка“

За еден час паркирање ќе се плаќаат 35 денари, а времетраењето на паркирањето ќе биде ограничено

Зонското паркирање ќе се прошири на нови локации во општините Чаир, Аеродром и Центар најавуваат од јавното претпријатие „Градски паркинг“. Првата локација каде што ќе се уредува паркирањето, што се планира да профункционира за една седмица е улицата непосредно до трговскиот центар „Мавровка“.

На потегот ќе бидат обележани 97 нови места за паркирање, што ќе влезат во втората зона. За еден час паркирање ќе се плаќаат 35 денари, а времетраењето на паркирањето ќе биде ограничено. Зонско паркирање и еден затворен паркинг ќе има и во близина на здравствениот дом „Чаир“, како и на улицата пред Театарот на народностите.

„Градоначалникот на Чаир, Изет Меџити, предложи неколку локации каде што се создава најголем хаос и каде што има потреба од регулирање на паркирањето. Соработката е одлична и ќе продолжи и со уредување на нови паркинзи во оваа општина“, вели директорот на „Градски паркинг“, Панче Стојановски.

Во јуни зонско паркирање ќе почне да се применува и во општина Аеродром, зад слаткарницата „Палма“. Во моментов се изработува проектот, по што ќе стартува бележењето на паркинг-местата. Паркиралиштето влегува во зелената зона каде што времето на задржување не е ограничено, а еден час паркирање ќе чини 25 денари.

Од јавното претпријатие најавуваат и отворање на паркингот „Камен мост“, каде што за петнаесетина дена, исто така, ќе се применува зонското паркирање. Паркиралиштето е во првата зона каде што час паркирање ќе чини 45 денари. (С.Н.)