„Експрес“: ОТЕ размислува за продажба на „Космофон“
Во рамките на своите планови за реорганизација, грчката телекомуникациска компанија ОТЕ ја разгледува и можноста за продажба на македонскиот мобилен оператор „Космофон“, тврди електронското издание на грчкиот весник „Експрес“.
Весникот пренесува изјава на извршниот директор на ОТЕ Панагис Вурлумис, кој вели дека по влезот на „Дојче телеком“ во грчката компанија, ќе претстојат коренити промени на нејзината структура на Балканот, но дека нема да има сериозни промени на грчкиот телекомуникацски пазар.
Вурлумис наведува дека се размислува за продажба на мобилниот оператор на ОТЕ во Македонија „Космофон“, од причина што и „Дојче телеком“ во земјата „има компанија-ќерка која контролира 80 проценти од пазарот“. Тој нагласува дека според годишната програма за работа на ОТЕ, предвидени се инвестиции од една милијарда евра и во Грција и на целиот Балкан.
Вурлумис тврди дека ОТЕ е задоволна од работата на нејзините филијали во Бугарија и во Албанија и дека е заинтересирана за зголемување на својот удел во српскиот телеком. (МИА)
