За поплавената „Јане Сандански“ виновна бугарската фирма

Поликлиниката „Јане Сандански“ во Аеродром вчера беше експресно покриена откако завчера дождот поплави повеќе ординации. Објектот беше оставен отворен, бидејќи моментално се работи на реконструкција на стариот покров. Бугарската фирма, која ги изведува градежните работи на поликлиниката, ќе ја надомести штетата направена од поплавата. Ова го соопшти Министерството за здравство, по направениот увид на поплавените простории. Согласно со договорот, а поради ненавремени превентивни мерки, сега фирмата-изведувач ќе мора да ги санира оштетените делови и да ги покрие трошоците за штетите на опремата.

Повеќе од 50 ординации во скопската поликлиника „Јане Сандански“ завчера беа поплавени поради тоа што фирмата ГБС од Благоевград, која ги изведува градежните работи околу реконструкцијата на покривот, остави непокриен голем дел од објектот. Иако, како што рекоа вработените од поликлиниката, работата требало да се одвива фазно, изведувачот одеднаш го кренал целиот покр��в и го оставил незаштитен објектот. Дождот почна да паѓа во саботата ноќта и иако врнеше непрекинато во текот на целиот ден, работниците се појавија дури попладнето и почнаа да ставаат најлони. Дотогаш, штетата веќе беше направена.

Дел од вработените во поликлиниката кои биле дежурни велат дека околу 3 часот по полноќ алармите се активирале сигнализирајќи дека има вода во просториите. Тие се обиделе нешто да сторат, но биле немоќни, бидејќи била поплавена голема површина. Кога утрото дошле вработените, биле запрепастени од тоа што го виделе. Ординациите, документацијата, скапа опрема, се' било поплавено. Струја немало, а постојано имало искричење од местата каде што допирала водата до инсталациите.

Од Министерството за здравство вчера соопштија дека бугарската фирма ГПС била избрана за изведувач на реконструкцијата на покривот на „Јане Сандански“ на јавен тендер спроведен под мониторинг на Банката за развој при Советот на Европа и надлежните државни органи. Истовремено, била избрана и фирмата која го врши надзорот на работата, а тоа е Градежниот институт „Македонија“. Како се случ��ло надзорот да дозволи објектот да остане непокриен и незаштитен со ништо и дали и тој ќе понесе дел од вината, од Министерството не кажуваат. (С.Р.)