Никогаш не е доцна да се студира

„Никогаш не е доцна да се почне и да се заврши факултет и да се собере повеќе знаење. Знаењето создава поголеми можности“, истакна вчера премиерот Никола Груевски, одговарајќи на новинарско прашање каква е неговата оцена за проектот за високото образование на повозрасни лица.

„Ако некој има 35 години, кога ќе заврши има 39, тоа не е човек што е стар и што треба да заборави на нови знаења и на нови напредувања. Некој што има 40 години и заврши на 44, треба да знае дека има уште 20 години до пензија. Зошто тие 20 години да не ги искористи во нешто што може да му донесе подобра плата, подобар бизнис и поголеми можности“, изјави Груевски по предавањето во употреба на новата плажа покрај кејот на Вардар.

Тој смета дека многу луѓе во времето кога требало да се запишат на факултет не го направиле тоа од различни причини. Како една од причините ја наведе транзицијата, кога, како што рече, многу луѓе почнале да веруваат дека знаењето не е вистинска вредност и оти нема многу да им помогне во животот.

Владата толку многу инвестира во образованието и се труди да им овозможи на граѓаните да почнат да учат повисок степен на образование од она што го имаат. Според Груевски, цврсто се убедени дека на долг рок знаењето и образованието се она што Македонија можат да ја претворат од земја во развој во развиена држава и оти колку повеќе има граѓани со поголемо знаење, тие се посилни и автоматски и државата ќе биде посилна.

Премиерот појасни дека резултатите од проектот ќе дојдат по 10-15 години и тоа земјата ќе ја направи многу посилна. (МИА)