Сонцето ги спаси „Око“ и фонтаните во Вардар

Дводневниот зголемен водостој не ги довел во опасност објектите од „Скопје 2014“

Сончевото време и смаленото ниво на Вардар во споредба со водостојот во изминатиов викенд, вчера на терен укажуваше дека темелите на мостот „Око“ и фонтаните во реката, сепак, се спасија. Изградбата на објектите, кои се дел од „Скопје 2014“, продолжи по дводневниот прекин поради надојдениот Вардар во саботата и во неделата.

Општинарите од Центар тврдат дека дводневниот зголемен водостој на реката не ја довел во опасност изградбата на мостот и на двете фонтани. Единствено била направена незначителна штета на дел од насипот, која не е пречка за продолжување на градежните работи. Состојбата би била поразлична, како што напоменаа од општината, доколку продолжело покачувањето на водостојот.

„Градежните работи што се однесуваа на темелење во водата веќе се завршени, при што покачувањето на нивото на реката нема да претставува проблем за продолжување на останатите градежни активности и нема да бидат предизвикани штетни последици врз работата“, велат од општината Центар.

Оттаму информираат дека за мостот досега се завршени подземните армирано бетонски работи, а останатите градежни работи се одвиваат според утврдениот план и динамика за работа. На фонтаните, пак, во тек е завршната фаза на армирано бетонските работи и се изведува плоча на втората фонтана врз веќе изведени колови (сипови). (Дс.Т.)