Дијаспората првпат го дава својот глас
Вкупно 7.258 македонски државјани што живеат во странство се пријавија да гласаат првпат на парламентарни избори во земјата, кои за нив ќе се одржат денес на шест континенти. Бројката е далеку под очекувањата во земјата кога се најавуваше одлуката, најмногу поради слабиот интерес, немањето податоци за нашите граѓани во странство и тешкотиите да се извадат македонски пасоши. Поради тоа, некои веќе го спорат легитимитет на избраните пратеници, бидејќи зад нивниот мандат ќе застане симболичен број гласачи, некаде толку мал што не беше можно и да се пријават и регистрираат независни кандидати.
Дијаспората ќе избере тројца пратеници во Собранието - по еден во Европа и во Африка; во Северна и во Јужна Америка; и во Австралија и во Азија. Од нив, во Европа и во Африка се пријавиле 4.653 гласачи, во Северна и во Јужна Америка - 1.832, а во Австралија и во Азија - 773 избирачи. Во Европа и во Африка ќе се гласа за осуммина кандидати на македонските партии, во Америка за седуммина, а во Австралија за четворица кандидати. Во сите 38 избирачки места во странство, изборите ќе ги спроведуваат одбори од по десетмина члена, ако успеат да пристигнат сите по нивното хаотично заминување поради пропуштени авиони, необезбедени визи или лоша организација. (Н.Р.)
|
