Кралот и кралицата на „Тиквешкиот гроздобер“ и боговите кренаа здравица за многу род и пари за лозарите

Кавадарци - Неколку илјади граѓани од Кавадарци и гости завчеравечер го проследија карневалското дефиле од „Тиквешкиот гроздобер“. Трагедијата во Охрид ги пролонгира овие активности за еден ден поради што беше и намален бројот на карневалските поставки.

Тринаесет поставки беа годинава дел од карневалот. Сепак, преполните улици во Кавадарци говорат дека имаше уште еден успешен карневал и, генерално, успешна манифестација „Тиквешки гроздобер“. И годинава не изостанаа основните белези на градот, градски оркестар, мажуретки и, секако, грозјето, виното и ракијата.

Кралот и кралицата на „Тиквешкиот гроздобер“ и боговите кренаа здравица за богат гроздобер, за многу род и пари за лозарите. Во завршната сцена не изостана симболичното газење на грозјето. Возбудувањата беа надополнети со спектакуларен огномет кој неколку минути ги привлекоа погледите на граѓаните.

На големиот вински карневал му претходеше детскиот карневал на кој младите од детската градинка и основните училишта ги покажаа своите желби, фантазии. Младоста и искреноста ги претставија традиционалните белези на овој град пред своите родители, роднини и пријатели. Настап имаа и дечињата од детскиот фестивал „Гроздоберче“. (А. Д.)