Од конформист во активист

Нинослав Тимов, Скопје

Почитувана Редакцијо, пишувам за да ги пренесам моите впечатоци и мојата трансформација од конформист во активист! Пред неколку дена бев дел од прославата по повод 19 години СДСМ, 19 години другарство, солидарност и почитување.

До пред некое време само ја следев политичката сцена со особен интерес, но не бев активно инволвиран. За себе отсекогаш сметав, според своите ставови, дека гравитирам или на политичкиот компас се лоцирам кон лево, ми недостасуваше само фитилот за партиски да се обојам – фитили има многу од ова катастрофално работење на ВМРО-ДПМНЕ.

Сега можам со особено задоволство да кажам дека од 20 април сум и официјално член на СДСМ, и јас бев од оние 1.500 нови членови социјалдемократи што имаа чест да ги примат членските книшки од претседателот на партијата Бранко Црвенковски. Време беше овој конформизам да го заменам со активизам, мислам дека е во вистинско време и за мене, но, пред се', за Македонија.

Сметам дека е време нашиов народ да се крене во политички активизам, во политичка борба и политичка пресметка, во борба за општествените идеали и принципи за да ја смени актуелната политичка гарнитура што и' нанесе огромни штети на Република Македонија и ги прокоцка сите шанси, уништи се' што досега беше домаќински изградено.

Верувам дека секој човек ги поседува социјалдемократските вредности што се рамка на секое нормално, морално општество, општество со усвоени заеднички вредности. Време е да ги вратиме тие, вистинските вредности во нашите маала, меѓу нашите деца и млади. Вредности што ги застапуваат сите другари и другарки, сегашни мои сопартијци.