Објавена книга за девојчето-невеста на пророкот Мухамед
Во романот се следи животот на Ајша од шестгодишна возраст до смртта на пророкот
Во САД, пред предвидениот термин, објавен е роман за девојчето-невеста на пророкот Мухамед откако беше нападната канцеларијата на британскиот издавач. „Бјуфорд букс“ ја објави „Скапоцениот камен од Медина“ од Шери Џонс во САД откако „Рандом хаус“ се откажа од намерата поради стравувањата дека тоа би можело да поттикне насилство.
Во романот се следи животот на Ајша од шестгодишна возраст до смртта на пророкот. „Бјуфорд букс“ соопшти дека го издава романот пред планираниот термин за да може да биде проценет според литературните вредности, а не да се гледа како потенцијална навреда што би можела да ја предизвика кај муслиманите.
Ерик Кампман, претседател на „Бјуфорд букс“, изјави: „Сметавме дека е подобро за сите да се дозволи разговорот да се пренасочи од конверзација за терористи и уплашени издавачи кон конверзација за вредностите на самата книга“. „Рандом хаус“ соопшти дека била советувана дека романот би можел да биде навредлив за дел од муслиманската заедница.
Во 2006 година избувнаа голем број безредија низ многу муслимански земји поради карикатурата на пророкот Мухамед објавена во дански весник. Џонс изјави дека не знаела дали „Гибсон сквер“ ќе продолжи со издавањето во Велика Британија. Али Бехешти (40), Абрар Мирза (22) и Абас Таџ (30) се вратени во притвор до 17 октомври поради поврзаност со нападот. (Би-Би-Си) | 
