Од партиска комисија до директор на регулаторно тело

Гордана Ивановиќ е нов претседател на Комисијата за електронски комуникации

Македонскиот парламент само со гласовите на владејачкото мнозинство вчера ја избра Гордана Ивановиќ за нов претседател на Комисијата за електронски комуникации - тело во рамките на Агенцијата за електронски комуникации. Опозицијата жестоко го критикуваше изборот на Ивановиќ, обвинувајќи дека се прави уште еден партиски упад во независните регулаторни тела. Притоа, беше посочено дека партискиот ангажман на Ивановиќ (член на Комисијата за финансирање и монетарни прашања на ВМРО-ДПМНЕ) претставува сериозна пречка таа да биде на чело на Комисијата. Имено, Законот за електронски комуникации забранува претседателот на Комисијата за електронски комуникации да извршува должности во органи и тела на политички партии.

Социјалдемократите се убедени дека Ивановиќ е нестручна да ја извршува функцијата. Во нејзината биографија не може да се прочита дека има какво било искуство од областа на електронските комуникации. Ова претставува голем хендикеп, и како што сметаат опозиционерите, ја прави некомпетентна да ја контролира работата на Агенцијата за електронски комуникации.

Шефицата на пратеничката група на СДСМ, Цветанка Иванова, рече дека со нејзиниот избор ВМРО-ДПМНЕ прави груба партизација на независното регулатроно тело. „Груевски се оглушува на препораките од Советот на Европа и наместо на европската агенда, работи на партиската“, смета Иванова.

„Единствено нешто што ја поврзува Ивановиќ со ова тело е тоа што таа, како и двајца негови членови потекнуваат од Кабинетот на премиерот. Таа нема работно искуство во оваа сфера. Прво работно место и' било во Министерството за финансии кога Груевски беше министер“, рече пратеникот од СДСМ, Никола Ќуркчиев.

За ВМРО-ДПМНЕ, Ивановиќ е сосема компетентна личност, има високо образование и ги исполнува законските услови за функцијата на која доаѓа. Според пратениците од владејачката партија, состојбите во електронските комуникации биле многу полоши во времето кога на власт била СДСМ. Во тој контекст беа споменати: немањето конкуренција во фиксната телефонија, високи цени во мобилната телефонија, мали��т процент на користење на Интернетот. „Треба да кажеме дека кога вие бевте на власт, избиравте луѓе блиски до вашата политика, а ние луѓе блиски до нашата политика, со цел да може таа да се реализира. За нашата политика и изборот на кадри говорат резултатите што се постигнати во оваа сфера“, рече претседателот на Комисијата за избори и именувања, Илија Димовски, од ВМРО-ДПМНЕ.

Во таа насока беше и настапот на пратеникот Влатко Ѓорчев од ВМРО-ДПМНЕ. „Граѓаните не ги интересира што зборуваме, каква кадровска политика имаме, туку дали со она што го правиме, со телата што ги избираме им се овозможуваат подобри услови“, рече тој.

По изборот на Ивановиќ, Собранието ги избра Синиша Ивановски и Слободан Чашуле за членови на Советот на Македонската радио-телевизија. (О.В.)