Волстрит продолжува да расте
Индексот Дау Џонс порасна за 3,46 отсто, трет ден по ред
ЊуЈорк-Лондон - Цените на акциите на Волстрит на вчерашното тргување забележаа силен пораст, трет ден едноподруго, благодарение на добрите вести од финансискиот сектор и охрабрувачките макроекономски податоци. Индексот Дау Џонс порасна за 3,46 отсто на 7.170 поени, пробивајќи се прв пат од 27 февруари над границата од 7.000 поени. Индексот Стандард и Пурс 500 оствари пораст од 4,07 отсто, додека Насдак порасна за 3,97 отсто.
Предводник на ваквиот позитивен тренд одново беше финансискиот сектор, откако директорот на Бенк оф Америка, објави дека банката во првите два месеци од годината остварила добивка. Претходно позитивни резултати од работењето објавија и Ситигруп и ЏејПи Морган Чејс. Според аналитичарите, прерано е да се каже дали овој раст на индексите е почеток на растечки бран, или станува збор за привремено превирање на пазарот.
Инаку, според лондонски „Фајненшел тајмс“, двата различни пристапа што ги имаат САД и Европа околу тоа како да се надмине актуелната финансиска и економска криза во светот, го загрозува успехот на претстојниот лондонски антикризен самит на Г-20. Весникот наведува дека САД инсистираат да се стави акцент врз мерките за поттикнување на стопанството, со уште поголема државна потрошувачка, која на тој начин би ја поттикнала вкупната побарувачка. За разлика од тоа, европските земји, предводени од Франција и Германија, своите заложби ги ставаат пред се' врз поостра контрола врз финансиските институции и врз кредитниот пазар.
Во меѓувреме, портпаролот на Белата куќа, Роберт Гибс, соопшти дека американскиот претседател Барак Обама нема да настојува за прифаќање конкретен економски договор на средбата на врвот на Г-20. (МИА, Макфакс)
|
