„Тајмс“ обвинува дека македонските мировници во Кабул се пијанеле

АРМ демантира дека македонски војници биле вратени од мисијата во Авганистан поради проблеми со алкохол

Светлана Унковска

Лондонски „Тајмс“ на својата Интернет-страница пренесува текст посветен на проблемите со непримерното однесување на војниците од воениот контингент на мисијата на НАТО во Авганистан, ИСАФ. Авторот на текстот во голем дел од содржината наведува дека војниците на германските воени трупи, во воената база често пати биле пијани, но, исто така, пишува и дека „оваа година група македонски војници биле вратени дома откако биле фатени пијани на должност, додека ја обезбедувале задната врата на базата“. Ваквите информации АРМ ги отфрла како невистинити и тврди дека ниту оваа година, а ниту кога било порано не се случило ниту еден македонски војник да биде вратен од мисијата, за никаков прекршок, а не за ваков тежок дисциплински прекршок. Од АРМ најавуваат дека за написот во врска со македонските војници ќе реагираат со демант.

Весникот во своето издание од вторникот на Интернет-страницата го објавил текстот на дописникот од Кабул, Џером Старки, кој пишува дека по минатонеделното бомбардирање на НАТО, кога загинаа 125 лица, генерал Стенли Мекристал решил итно да ја стави ситуацијата под контрола. Кога се обидел да стапи во контакт со некои од војниците, сфатил дека тие се пијани или се мамурливи за да му одговорат, пишува авторот. Во голем дел од текстот тој најмногу ги обвинува германските војници како одговорни за непланираниот напад, но, исто така, наведува и дека таквата грешка се случила поради тоа што војниците најчесто биле пијани и се забавувале по цели ноќи.

Меѓутоа, во текстот, иако само со една реченица, сепак, тој наведува дека проблеми со алкохол имале и македонските мировници и оти поради тоа некои од нив годинава од базата во Авганистан биле вратени дома. Авторот Старки притоа не наведува ниту за колку војници станува збор, ниту, пак, кога биле вратени дома.

„Група македонски војници беа испратена дома годинава, бидејќи беа фатени пијани на должност додека го обезбедуваа задниот влез“, наведува авторот и не наведува какви било податоци со кои би ја поткрепил информацијата.

Од АРМ ваквите информации ги отфрлаат и тврдат дека станува збор за груби невистини и оти ниту еден македонски војник, ниту од одговорните на ИСАФ е вратен ниту имало какви било проблеми или забелешки.

„Децидно негираме и ги отфрламе ваквите информации како неточни, сметајќи ги како груби шпекулации. Македонскиот контингент м��ровници се врати во земјава откако целосно ја исполни својата мисија од шест месеци. Тие заминаа во јануари и се вратија во јули, без притоа да имаме какви било забелешки за нивната професионалност, а не да станува збор за ваков груб дисциплински прекршок. За македонските мировници, откако сме присутни во мисијата ИСАФ, немало никакви поплаки. Напротив“, вели портпаролот на АРМ, Мирче Ѓорговски. На информациите што се пренесени од дописникот на лондонски „Тајмс“ вели дека ќе реагираат и оти уште денеска ќе испратат демант со барање за извинување поради објавување на вакви груби невистини за македонските мировници.