Цел Врховен суд одлучува за изборните жалби
Партијата на Мендух Тачи, ДПА, поднесе повеќе жалби од приговори
Катица Чангова
Цел Врховен суд, зад затворени врати, одлучува за изборните жалби. Дваесетина врховни судии од завчера, во цел состав, поделени во петчлени совети, под полна пареа работеа на 94 предмети за 195 гласачки места и за поништување на резултатите во три изборни единици. Се очекува најдоцна денеска да се знае дали повторно на избори ќе излезат околу 170.000 граѓани со право на глас, најмногу во „шестката“ – 110.000 гласачи како што веќе реши Државната изборна комисија или тоа ќе биде многу поголема бројка.
Жалбите на незадоволните учесници во изборната трка ги примаше ДИК, но не ги отвораше и по автоматизам ги проследуваше до Врховниот суд кој, според Изборниот законик, треба да се изјасни по 48 часа од приемот. Судската одлука е конечна.
Делителите на правдата од хиерархиски највисоката судска инстанција, по потреба ја отвораа содржината на изборниот материјал што ја бараа од ДИК како главен организатор во битката за освојување на пратенички мандати. Меѓутоа, на седниците на Врховниот суд не присуствуваат ниту членови на Државната изборна комисија, ниту овластени претставници на политичките партии кои ги обжалија решенијата на приговорите.
На позитивна одлука од Врховниот се надеваат Демократската партија на Албанците, која има 89 жалби за 186 гласачки места што се однесуваат на „единицата“ „двојката, „петката“ и „шестката“. Интересно е тоа што партијата на Мендух Тачи поднесе повеќе жалби од приговори, односно ДИК одлучуваше за нерегуларности во 131 избирачко место.
ДУИ на Али Ахмети подготви четири жалби до Врховниот суд. Од нив три се за 10 гласачки места во Тетово, Теарце и во „двојката“, додека со една жалба се бара поништување на гласањето во цела изборна единица - Тетовско - гостиварската. Станува збор за жалба која, доколку биде прифатена од врховните судии, био значело нови изборни резултати за 435 избирачки места или за гласање на 311.729 гласачи. Жалбите на ТМРО се однесуваат за из��орните единици четири и пет. Коалиците од македонскиот политички блок, предводени од ВМРО-ДПМНЕ и од СДСМ решија да не продолжат со жалбена постапка.
Партиите се жалат на многу нерегуларности при гласањето: повреда на тајноста, гласање во име на друго лице, полнење кутии, кражба на избирачки материјали – записници, изводи од списоци на гласачи, недостиг на гласачки ливчиња... |
