Насловна

Отворен стечај за А1 телевизија

Основниот суд Скопје 2, по неколкучасовна расправа, донесе одлука А1 да оди под стечај

Љубиша Станковиќ



Судијката Наташа Савовска-Димитровска по неколкучасовна расправа, донесе решение со кое за Трговското радиодифузно друштво „А1 Телевизија“ се отвора стечајна постапка. Со решението што го донесе судијката од Основниот суд Скопје 2 - Скопје, досегашниот привремен стечаен управник Ацо Петров се именува за стечаен управник.

Решението на судот подразбира дека во иднина со движениот и со недвижниот имот на Велија Рамковски ќе располага стечајниот управник Ацо Петров, кој како и претставникот на Управата за јавни приходи и државниот правобранител, е на мислење дека А1 телевизија заедно со поврзаните фирми од „Перо Наков“ број 60 повеќе не е во можност да ги сервисира долговите.

„Неликвидноста на компанијата е видлива. Со заемите само се генерира голем долг, па фирмата покажува несолвентност. Исполнети се условите за отворање стечајна постапка, а должникот има доволно средства да ги покрие трошоците на стечајната постапка“, рече вчера на крајот од својата елаборација новоименуваниот стечаен управник, Ацо Петров.

Залудни беа напорите на адвокатот Донче Наков, инаку застапник на фирмата должник, да докажува дека А1 телевизија не должи 10 милиони евра, како што тврди Управата за јавни приходи - Регионална дирекција Скопје и дека во вештиот наод и мислење што е изработено за потребите на кривичниот предмет тој износ е минорен и дека Основниот суд Скопје 2 треба да ги побара на увид сите документи поврзани за овој случај и да одреди нов вештак.

Ставовите на правниот застапник на должникот А1 телевизија уследија по настапот на државниот правобранител, кој рече дека останува на предлогот за отворање стечајна постапка за А1 телевизија и дека се минати повеќе од 45 дена од денот кога сметката на оваа компанија беше блокирана. Правобранителот потврди дека постојат солидни докази што упатуваат на заклучокот дека фирмата е неликвидна.

„Барам предлогот за отворање стечај судот да го одбие, пред се', поради фактот дека постојат две паралелни постапки во кои Управата за јавни приходи нуди сосема поинакви бројки за ист правен субјект и за ист временски период“, рече адвокатот Донче Наков, и појасни дека во управен спор од А1 телевизија се бараат девет милиони евра, а истиот тој износ во кривичниот предмет е само 10 до 20 отсто од наведената сума.

Адвокатот Наков смета дека судот треба да ангажира нов вештак што ќе ја утврди вистинската сума што ја должи телевизијата и за која Јавното обвинителство смета дека долгот не е повисок од 1,5 милиони евра. Тој рече дека моментално на сметката на телевизијата има 900.000 евра, а има побарувања од уште еден милион евра.

Привремениот стечаен управник, Ацо Петров, во својата анализа направена во изминатиот период, потврди дека во фирмата должник, и на неа сродните компании, биле ангажирани повеќе од 240 работници од кои 143 биле со регулиран работен однос на неопределено време. Петров кажа дека предмет на анализа биле билансите на компанијата за 2009 година кога последен пат била приложена завршна сметка. Според Петров, анализа е направена и за минатата година и според она што го прикажале бројките, пасивата на А1 телевизија е поголема од нејзината актива.

Според привремениот стечаен управник само кон УЈП, а на име неплатен ДДВ, данок на добивка и по уште неколку основи компанијата должи 513 милиони денари. Изразено низ бројки, како што беше кажано, фирмата должник само за плаќање на обврски треба да исплати 1,2 милијарди денари на што се надоврзува и долг од 521 милион денари.

„Од настанатиот долг А1 телевизија може да покрие само 4,3 отсто од вкупниот долг на фирмата должник. Ова значи дека и во иднина ќе се работи со загуба“, рече Ацо Петров и побара од судот да отвори стечај за А1 телевизија.

И по барањето на привремениот стечаен управник за поведување постапка за А1 телевизија следеше реакција од адвокатот Наков, кој смета дека се' што било изнесено се однесува на периодот до 2011 година, но не и за изминатите седум месеци во кои фирмата „инкасирала“ два милиона евра.

„Не е целта да се купува време. Крајната цел е да се утврди вистинската состојба, а тоа може да се направи со увид во целокупната документација“, рече адвокатот Донче Наков и јавно ги запраша претставниците на државата: Зошто досега никој од нив не ги подигнал парите на А1 телевизија, а на кои не е пресметана и камата?

За А1 телевизија со свој став вчера излегоа и Здружението на новинарите (ЗНМ) и Самостојниот синдикат на новинарите и медиумски работници (ССНМ). Во заедничкото соопштение се изразува жалење поради отворањето стечај, но и надеж дека тоа нема да доведе до згаснување на телевизијата.

„Очекуваме дека сите надлежни инстанции што решаваат за судбината на А1 ќе го споделат нашето уверување дека македонскиот медиумски простор би бил сериозно осиромашен со затворањето на најстарата приватна телевизија во Република Македонија. Особено загрижувачки е фактот што стечајната постапка би можела да доведе до губење работа на голем број наши колеги“, се вели во соопштението.

Од Синдикатот потврдуваат дека се во комуникација со синдикалниот пре��ставник на ТВ А1 и дека до членовите доставиле образец за побарувања што треба да се упатат до стечајниот управник во случај на прекин на работниот однос. Синдикатот им нуди правен совет и помош на своите членови за сите натамошни чекори.