Предвремени избори - стратегијата на Груевски?

Премиерот најави нови чекори доколку со СДСМ не се најде решение за Комисијата за настаните од 24 декември

Горан Адамовски

Ако наскоро не се најде решение за Комисијата за утврдување на вистината за настаните во Собранието од 24 декември, ВМРО-ДПМНЕ ќе примени нова стратегија, најави премиерот Никола Груевски при саботното пуштање во употреба на новата спортска сала кај мавровското село Ростуше. Претседателот на Владата е уверен оти СДСМ го кочи донесувањето на заклучокот, од кој зависи европската иднина на земјава, и уште еднаш го впери прстот кон довчерашниот опозициски лидер Бранко Црвенковски.

Првиот човек на ВМРО-ДПМНЕ не прецизираше од што ќе се состои новата стратегија, но се' погласно се шпекулира дека во најскоро време земјава ќе се соочи со парламентарни избори. Блокадата на Комисијата, безнадежната европска перспектива, односите топло-ладно меѓу коалициските партнери во Владата, но и се' уште неподготвениот за битка СДСМ, се адутите на заговарачите за распишување предвремени избори, најдоцна напролет кога ќе гласаме за претседател на земјава.

„Мислам дека предвремени парламентарни избори ќе имаме напролет, а можеби и порано“, уверен е аналитичарот Роберт Несими.

Според него, ВМРО-ДПМНЕ и ДУИ во претстојниот период ќе „изглумат“ големи несогласувања околу спорот за името и тоа ќе се искористи како повод за распишување избори.

„Можеби ќе ги искористат и разликите околу бранителите, но во тоа не верувам, особено што помина ‘Слупчане‘. Но, името е секогаш актуелна тема. ДУИ се преправа дека е активна во надминување на спорот, тоа што го прави е само мачкање очи“, анализира Несими. Надополнува дека на СДСМ повеќе би му одговарало следното изборно соочување да биде во редовниот термин во 2015 година, оти „сега не е подготвен за победа, а од друга страна, ВМРО-ДПМНЕ и ДУИ водат погубна политика и нивниот рејтинг паѓа како што одминува времето“.

Професорот Јове Кекеновски е оптимист дека ќе има договор меѓу двете најголеми партии во Македонија околу предновогодишните случувања во Собранието.

„Комисијата мора да најде заеднички јазик и да изготви извештај, без разлика дали некому ќе му одговара, бидејќи тоа е обврска од мартовскиот договор. Второ, неделава ќе имаме засилени посети од странство, тие сигурно ќе извршат притисок и ќе се најде компромис меѓу двете страни. Трето, доколку не успее тоа, најверојатно, ќе го изгубиме позитивниот извештај од ЕК или воопшто нема да бидеме споменати како на јунскиот самит. Ако се случи тоа, плус самото однесување на ДУИ во коалицијата, ми налага да мислам дека единствен излез ќе биде распишување нови избори и тоа во најбрзо време, дури и пред Нова година“, вели Кекеновски.

Премиерот Груевски во саботата уште еднаш заклучи дека Црвенковски е проблемот што Комисијата не го усвои заклучокот, кој, како што вели, веќе бил готов. „Извештајот на Комисијата за утврдување на настаните од 24 декември 2012 беше речиси готов и пред објавување, но се искомплицира со враќањето од одмор на Бранко Црвенковски, кој испорача нови барања. Тој е главниот виновник за блокадата, која може негативно да се одрази на претстојниот извештај на Европската комисија за напредокот на Република Македонија“, рече лидерот на ВМРО-ДПМНЕ.

Тој смета дека СДСМ е заложник на поранешниот лидер, кој ги влечел сите конци, иако има ново раководство. „Ние како ВМРО-ДПМНЕ постојано се обидувавме нешто да направивме, ги баравме за да се придвижи, зашто извештајот е 99,9 отсто завршен и да не беше враќањето на Бранко Црвенковски, следуваа да се усогласат само ситни финеси и тој да се изгласа. Се' уште се надевам дека во наредните денови ќе се најде решение, но веќе и нема многу време зашто истекуваат роковите и последиците подоцна доаѓаат. Како партија нема да останеме неми набљудувачи на овие последици и доколку во наредните денови не се најде решение, ќе размислиме за нови чекори и нови стратегии кои ќе бидат сосема различно од она што е сега“, изјави Груевски.

СДСМ, реагирајќи на обвинувањата, соопшти дека со лиферување вакви лажни информации ВМРО-ДПМНЕ покажува дека не само што сака да ја избегне одговорноста за нефункционирањето на Комисијата за 24 декември туку и дека никогаш искрено немало намера да ги исполни своите обврски и да го испочитува договорот постигнат на 1 март.

„Натамошното функционирање на Комисијата, по повлекувањето на претседателот Давитковски, е одговорност на власта и на претседателот Иванов, чијашто обврска е именувањето прв човек на Комисијата“, велат во СДСМ, обвинувајќи дека „лошите политики на Груевски и на оваа Влада во континуитет ја комплицираат европската иднина на земјата“.