Вебер песимист пред Монако

Марк Вебер ги минимизира шансите на Ред бул за повторување на доминацијата од трката во Шпанија низ улиците на Монте Карло викендов. Тој беше далеку најбрз возач во Барселона минатиот викенд, кога ја освои пол-позицијата со предност од речиси цела секунда. На тоа ја надоврза победата со беспрекорно возење од стартот до целта, во која влезе 24 секунди пред второпласираниот Фернандо Алонсо. Сепак, Австралиецот ги олади тие што очекуваат од него формата од Шпанија да ја повтори и во Монако.

„Исклучителна ситуација беше пол-позицијата со разлика од една секунда“, вели тој. „Мислам дека не може да се очекува да создадеме таква разлика и овде, бидејќи станува збор за краток круг и не треба многу за да се помине. Друга работа е што времињата во Монако по традиција секогаш се многу блиски. Ова е различно поставена патека, местото е уникатно и не можете да го дизајнирате вашиот Ф1-болид за Монте Карло поради тоа што има само една патека како оваа во годината. Тоа е место што многу бара од болидот и од возачот и бара доста различни работи во споредба со другите патеки. Треба да победите со разлика толку колку што е потребно и се надевам дека ние се' уште можеме да го сториме тоа, но дали ќе бидеме еднакво доминантни останува да се види. Смета дека ќе имаме многу, многу компетитивен викенд со Мекларен, Ферари и Мерцедес“.