Претходен број

Тачи не е загрижен поради одлевањето на членството

Светлана Унковска

Лидерот на ДПА Мендух Тачи порача од Приштина дека не е загрижен поради заминувањето на високи членови од неговата партија и дека тоа не значи и постоење внатрепартиски расколи и потреси. Ова е прво појавување во јавноста на Тачи откако сега веќе поранешниот потпретседател на ДПА Имер Селмани објави дека заедно со поголем број од партиското раководство и членство ја напуштаат партијата и формираат нов политички субјект.

Деновиве неколку општински разграноци на ДПА во Скопје, како што се Чаир, Бутел и Сарај, и официјално преку соопштенија објавија дека преминуваат во новата партија на Селмани, а веднаш по нив со соопштенија потпишани од општинските лидери своето заминување од партијата на Тачи го потврдија и разграноците од Гостивар, Сопиште и Арачиново. Од партијата на Тачи ваквите информации ги отфрлаат како неточни и тврдат дека со партијата на Селмани заминало само членството од разгранокот на Сарај.

Инаку, Тачи по средбата со косовскиот опозициски лидер Рамуш Харадинај, како што пренесува Алсат-М телевизија, изјавил дека тој не стравува од одливот на партиските функционери и дел од членството, бидејќи од партијата заминале луѓе кои не сакале да бидат во опозиција. „Тоа се само неколку поединци кои презедоа ваков чекор. Нема потреси внатре во структурата на ДПА. За мене е чест да сме во опозиција, а за некого тоа претставува вознемирување“, изјави Тачи од Приштина.

Премиерот Груевски, коментирајќи ги обвинувањата дека зад формирањето на новата партија на Селмани е поврзано со негово ветување за вицепремиерско место на поранешниот министер за здравство, рече дека такво нешто не постоело и оти немал никакви контакти во таа насока. „Имер Селмани е подолго време во политиката и тој може најдобро да ги објасни причините за создавањето нова партија“, истакна Груевски, според кого ова се природни процеси на партија која ги изгуби изборите.