Фирми лелекаат од давачките за телевизија

Дуќанџиите се жалат дека им се повлекуваат пари од сметка за ТВ-такса, а телевизори и програма воопшто немаат

Гојко Ефтоски


ТЕТОВО – Тетовката Зорица М. има деловен простор од три квадратни метри, во кој не може ниту да се заврти, а камоли да стави телевизор и да гледа програма. Во овој мал објект таа продава весници, списанија и земјоделски производи, кои сама ги произведува. Од тоа што ќе го продаде едвај го врзува крајот за да го помине месецот. Капак на се' е што неодамна добила налог за присилна наплата на радиодифузна такса за ТВ-апарат во дуќанот што воопшто не го поседува!

„Ваков надомест не можам да поднесам. Овде не може да се извади ниту за скромна заработувачка, а не и за вакви трошоци што немаат врска со реалноста“, вели Зорица.

На повеќе фирми како правни лица, трговци поединци, клубови, здруженија и други асоцијации им се доставени налози за извршување, со цел присилна наплата на радиодифузна такса. Вакви акти се дистрибуирани и до банките каде што имаат отворено сметки за прилив и исплата на финансиски средства. Налозите за извршување, главно, се доставени од приватни судски извршители. Бидејќи се работи за долг од минатата година, на доверителите присилно им се наплаќа главен долг од 1.560 денари како надомест за радиодифузна такса, 996 денари ДДВ и 6.147 денари како извршни трошоци на извршителот. Налозите за извршување предизвикуваат вистински лелек кај должниците. Велат дека без никаква претходна постапка им се повлекуваат средства од сметките, без да се провери фактичката состојба.

Тетовецот Рустем Б има регистрирано претпријатие за да обезбеди некаква егзистенција. „Навистина поседувам угостителски објект, но кој сака, нека дојде да провери дали имам радио или ТВ-приемник“, се жали Рустем Б., покажувајќи извод од банка дека веќе му се наплатени 8.703 денари.

На проблемите со наплата се жали и ковачот Џеваир Н., кој поправа алатки за домаќинство, кове железни предмети и работи во огромна бучава. „При оваа бучава, како можам да слушам радио ниту да гледам телевизија. Ова е срам што ми се прави“, вели тој.

Вакви поплаки можат да се слушнат од повеќе дуќани и занаетчии. Илија Стевчевски, извршен раководител на регионалната Занаетчиска комора во Тетово, вели дека на ова подрачје има над 3.000 занаетчии регистрирани како правни лица или трговци поединци. „На сите им се доставени налози за наплата на РТВ-такса. Многумина од нив дојдоа да е пожалат. Најмногу од нив велат дека се доведени до свршен чин иако немало никаква претходна постапка. И од нашата комора извршија наплаќање иако немаме ниту радио ниту телевизор“, вели Стефановски.

Поради големите трошоци, голем број клубови и здруженија што работат на волонтерска основа, се' почесто се одлучуваат да бидат избришани од регистарот и од евиденцијата за да не им доаѓаат несакани сметки.

„Секое правно лице е должно да ја плаќа радиодифузната такса. Постапката за наплата е уредена од доставување решение до исплата. Тие што не постапуваат по решенијата, принудно им се наплаќа. Тоа е обврска што произлегува од законот“, ни рекоа од канцеларијата на извршителот Весна Деловска од Скопје од каде што има пристигнато најголем број налози за извршување.