Скопјанец почина при тепачка со внукот
Жител на скопската населба Шуто Оризари починал при расправија и тепачка со внукот поради нерасчистени имотноправни односи. Како што соопштува скопската полиција, педесет и четиригодишниот Азир А. во еден момент се струполил на земјата, по што бил пренесен во болница каде што само е констатирана смрт.
На трагедијата му претходела расправија која се одвивала во скопската населба Шуто Оризари. Причина за расправијата, најверојатно, биле нерасчистени имотноправни односи. Караницата започнала завчера во вечерните часови околу 23,30 часот на улицата „Шуто Оризари“. Најпрвин се скарале Азир и неговиот внук од брат М.А.(29). Во тепачката се приклучил и братот на Азир, С.А.(46).
„Во еден момент на Азир му се слошило и паднал на земја, по што од екипа на Итна медицинска помош е пренесен во Воената болница во Скопје каде што е констатирана смрт. Извршен е увид на местото на настанот и во тек се мерки за целосно расчистување на случајот“, велат од МВР.
На местото на настанот се пронајдени нож, лопата и секира. (Д.Т.)
|
