Стратегијата на Андов за името се' уште чека
Стратегијата за решавање на спорот со името, предложена од парламентарецот Стојан Андов, која од февруари чека да дојде на дневен ред на седница на Собранието, најверојатно, ќе го дочека тоа во текот на првата декада од јуни. Андов вчера за медиумите изјави дека во средата од шефот на дипломатијата, Антонио Милошоски, добил писмо во кое тој му предложил работна средба околу стратегијата при крајот на овој месец.
„Да седнеме да поразговараме, да видиме, не знам што да видиме, но тој сака да каже некои работи, нека ми ги каже, в ред е“, го коментираше Андов предлогот за средбата, додавајќи дека потоа не може веќе никој да го запре и нема никакво оправдување неговиот документ да не оди на седница на Собранието. „Очекувам првата декада од јуни тоа да биде на седница“, вели Андов. Тој информираше дека одложувањето на ставање на стратегијата на дневен ред на Собранието во февруари било побарано од Владата поради изборите.
Андов прашан за советниците на претседателот кои се залагаат за прекин на преговорите со Грција, како што се професорите Светомир Шкариќ, Димитар Мирчев, кратко изјави: „Многу империи пропаднале поради лоши советници“. „Секој сам си избира советници, претседателот сам си ги избрал“, изјави Андов. Според него, можеби луѓето ќе ги променат своите ставови, бидејќи изјавите на претседателот во Брисел „дека веќе ја напушта фамозната двојна формула, се во друг правец од овие совети што порано ги давале овие професори“, коментираше Андов. (Т.Г.) |
