Неразбирливи сметки за парно отпечатени на неквалитетна хартија

Хартијата на која се печатат сметките „Топлификација“ ја набавува од две фирми

Скопјани и' забележуваат на „Топлификација“ за лошиот квалитет на сметките за парно. Не само што се изработени на неквалитетна хартија туку се и лошо отпечатени, па тешко се читливи. Од друга страна, пак, на потрошувачите им се даваат многу стручни објаснувања за инсталирана моќност, за испорачана топлинска енергија за која никој не разбира како се пресметува.

Од „Топлификација“ велат дека им се познати ваквите реакции на граѓаните, бидејќи голем број од потрошувачите им ги упатиле своите забелешки особено за лошиот квалитет на сметките. Објаснуваат дека за тоа што е наведено сметките, потрошувачите можат да се информираат на нивната веб- страница, а не ретко и самите даваат објаснување по телефон.

Од претпријатието и самите забележале дека квалитетот на хартијата е лош. Особено се неквалитетни октомвриските сметки. „Топлификација“ ги печати сметките со помош на двата печатача што ги набави минатата година. Две фирми ја доставувале хартијата на која се печатат сметките. На тендер најпрвин била избрана фирмата „Напредок“ од Тетово, која ги снабдувала со хартија заклучно со јулските сметки, кога по нивната забелешка си ја признале грешката. Но, од јули досега ја ангажирале фирмата „Генекс“ ДОО од Кочани. По забелешките на лошиот квалитет на хартијата за октомвриските сметки, „Топлификација“ повторно за набавка на хартија склучила договор со „Напредок“.

Прошетката од една до друга фирма, велат од претпријатието, ја прават поради тоа што не нашле друг доставувач на таков тип хартија, кој единствено одговара на нивните печатачи. Доколку „Напредок“ повторно потфрли во квалитетот, ќе му бидат откажани услугите, па ќе биде побаран трет снабдувач со хартија.

„Топлификација“ месечно изготвува 50.000 фактури, а ��а секоја хартијата ја чини по 3 денари. (Сн.К.)