Брана за професорите да предаваат на приватните универзитети

Дури 150 професори работат хонорарно, надвор од редовниот ангажман во државните институции

Жаклина Хаџи-Зафирова

Универзитетските професори кои се вработени на државните факултети, ако сакаат да работат хонорарно на некој од приватните високообразовни институции, ќе треба да бараат дозвола од Универзитетот „Св. Кирил и Методиј“. Оваа е една од промените што ќе ги воведе новиот ректор Велимир Стојковски, кои ги најави како дел од својата агенда за „ставање ред на Универзитетот“.

„Не може и понатаму асистентите да ги водат испитите и вежбите, а професорите да ги нема никаде“, е коментарот што ни го даде ректорот. Во Ректоратот деновиве пристигнаа и последните анкетни ливчиња за дополнителниот ангажман на професорите, кои претходно ректорот им ги испрати на професорите од Скопскиот универзитет „Св. Кирил и Методиј“. Според нив, дури 150 професори се изјасниле дека работат хонорарно, надвор од државните институции каде што се во редовен работен однос.

Во анкетата што ја организираше Ректоратот на Скопскиот универзитет биле анкетирани вкупно 2.000 професори, асистенти и соработници по разни основи. Од нив, 150 потврдно одговориле на прашањето дали се ангажирани надвор од институцијата, а од нив не се барало да кажат колку се платени за ангажманот. Но, толкава е и бројката на оние што не дале никаков одговор и не ги пополниле анкетните ливчиња. Ректорот Стојковски најави ригорозни мерки за сите оние кои погрешно ќе го известат за своите ангажмани или, пак, нема да ги пополнат ливчињата. Оние, пак, што ќе го скријат дополнителниот ангажман ќе добијат отказ.

„Во иднина, највисокото тело на Универзитетот - Сенатот ќе биде оној што ќе им дава дозвола на професорите дали ќе може да работат на друго место надвор од Универзитетот, за што досега одлучуваа нивните матични факултети“, дециден е ректорот. Оваа мерка тој ја најави како дел од својата стратегија за да се поврати имиџот на Скопскиот универзитет, нешто што го нагласи и кога беше избран за прв човек на Универзитетот.

Не е тајна дека дел од професорите на државните универзитети предаваат или имаат „тезги“ во други установи, но тоа досега не беше контролирано од страна на државата. Се случуваше професор да е ангажиран на повеќе места, но тоа не беше ограничено се' досега.

До факултетите е испратено писмо од Универзитетот во кое се цитираат одредби од Законот за високо образование, во кој е наведено дека отсега Универзитетот ќе дава согласност за надворешниот ангажман на професорите од државните факултети. Но, тоа нема да се однесува и доколку професорите сакаат да предаваат на државните факултети во рамките на Универзитетот, за што ќе им биде доволна дозволата од матичниот факултет.

Вакво писмо е испратено и до Економскиот факултет, чии професори имаат соработка со Машинскиот и со Филолошкиот факултет во размена на професори за предавање.

Деканот на Економскиот факултет, Бобек Шуклев, објаснува дека досега немале одлив на кадри на други факултети, со исклучок на двајца пензионирани професори, кои отишле на ФОН и на Европскиот универзитет. „Но, имаме и други професори кои се пензионирале и си останале доследни на оваа институција, бидејќи не работат никаде хонорарно по пензионирањето“, додава Шуклев.