Рикер: Признавањето на Косово е важна работа за регионот
Министерството ќе преземе мерки против директорите кои нема да ги вратат парите
ТЕТОВО - „Имав средби со лидерите на ДПА и на ДУИ, Мендух Тачи и Али Ахмети, во седиштата на партиите. Ова е прва средба од моето доаѓање на оваа должност. Се надевам дека и натаму ќе имам средби со нив, но и со лидери на други политички партии“, рече Филип Рикер, новиот амбасадор на САД во нашата земја за време на својот вчерашен престој во Тетово. Рикер рече дека имал средба и со градоначалникот Хазби Лика.
На новинарско прашање дали на средбите со лидерите на политичките партии разговарале за признавањето на Косово, американскиот амбасадор рече: „Се сретнав со претставници на власта и на опозицијата. Признавањето на Косово е важна работа и верувам дека и Македонија ќе го признае. Тој потег е важен за целиот регион. На оваа тема ќе имам средби и со други лидери“, одговори Рикер. Новинарите побараа мислење од амбасадорот и за прашањето за процесуирање на четирите хашки предмети. „Тоа се чувствителни прашања што треба да се разгледаат. Очекувам процес со праведен и транспарентен крај“.
Ахмети, како што се вели во соопштението на ДУИ, го известил амбасадорот дека „Владата функционира добро, има мали начелни разлики и дека двете страни се многу внимателни за прашањата што се на агендата, ги почитуваме договорите и нема пречки кои не можеме да ги надминеме“.
По посетата на ДПА и разговорот со најтесното раководство на партијата, лидерот Мендух Тачи на новинарите им изјави дека разговарале за приоритетни прашања од интерес на државата и за интегративните процеси, за хашките предмети и за примената на Законот за амнестија и други. „Се согласивме дека е потребна поголема флексибилност за решавање на сите прашања. Ни беше сугерирано нашата пратеничка група да се врати во парламентот, на што одговоривме дека ќе го сториме тоа откако Македонија ќе ја признае независноста на Косово“, рече Тачи. Неговиот став во врска со хашките предмети е дека со Законот за соработка со Трибуналот не било предвидено откако ќе се вратат, предметите да бидат процесуирани. Предметите биле вратени од Хаг без наредба за судска постапка.
Лидерот на ДПА му порача на својот политички опонент Али Ахмети да не бара меѓународна експертиза во врска со хашките случаи. „Некои работи не се учат во планина. Потребно е искуство, особено во пол��тиката“, рече Тачи. На новинарско прашање дали за процесуирањето на хашките случаи имало договор меѓу ДУИ и ВМРО-ДПМНЕ, Тачи рече: „Мислев дека можеби има. Сега сметам дека не е така. Ќе се послужам со поговорката: пајакот плете мрежа, во него сам не се фаќа. Таков е и овој случај. Барајќи логика за решение, сега разбрав дека нема ниту логика, ниту решение, ниту договор“, одговори Мендух Тачи. (Г.Е.) |
