Шекеранци ќе враќаат пари на газдите

БИТОЛА - Дваесет и петмина штрајкувачи од битолската Шеќерана кои беа отпуштени од работа треба да и' вратат на фабриката по 23 илјади денари за придонесите што им биле исплаќани за време на штрајкот. Вака пресуди судот во Битола откако претходно, одлучувајќи по тужба на бугарските газди, го прогласи работничкиот штрајкот за нелегитимен.

,,Судот го одби барањето на 25 лица за враќање во фабриката. Згора на тоа, судот донесе скандалозна одлука, ние, избрканите, да и' вратиме на фабриката по околу 400 евра за придонеси што биле плаќани додека штрајкувавме, а не земавме плата. Се прашуваме која голема ѕверка стои зад овие пресуди“, револтирано вели Пеце Милошевски, еден од избрканите работници.

Стотина вработени во Шеќераната лани со месеци штрајкуваа барајќи повисока плата и подобри услови за работење. Работниците со бугарските газди не постигнаа компромис, а судот во Битола одлучи во корист на работодавците.

„Бугарските газди не сакаа преговори, а сега бараат да им ги вратам парите на фабриката. Значи, да земам од уста на моите деца. А како кога сум на товар на Бирото за вработување и земам 4.000 денари месечно“, се жали Александар Давидовски, еден од избрканите. (А.Б.)