Македонија и Албанија имаат капацитет за поголема бизнис-соработка

„Економската соработка меѓу Македонија и Албанија воопшто не соодветствува со нивото на политичките односи, со можностите на двете економии и со фактот дека сме соседи“, рече претседателот Ѓорге Иванов во вчерашното обраќањето на Македонско-албанскиот бизнис-форум, на кој присуствуваше и претседателот на Албанија, Бамир Топи.

Енергетиката и инфраструктурната поврзаност се клучните сегменти на кои државите треба да се фокусираат во претстојниот период. „Постои голем потенцијал за економска размена меѓу стопанствата“, посочи Иванов и затоа се охрабрува организираниот пристап и пласман на македонските производи на албанскиот пазар и се поттикнуваат директните инвестиции на нашите претпријатија во Албанија и обратно, како и основањето мешовити компании.

Иванов и неговиот албански колега Топи се согласија околу потребата од отворање деловни центри во Скопје и во Тирана за дополнително олеснување на контактите и размената.

Според Топи, приоритет на Македонија и на Албанија треба да биде реализирањето на Коридорот 8, со лобирање во Брисел и изградбата на патиштата што ја поврзуваат Тирана со Дебар, Елбасан и Ќафасан. „Двете земји имаат капацитет, освен во туризмот, да ја развиваат соработката и во делот на рударството и металургијата“, рече Топи и потенцира дека е време од зборови да се премине на дела. Според него, добар политичар е оној што мисли на економијата.

На Форумот присуствува околу 100 бизнисмени од Македонија и од Албанија. Тие разменија искуства и разговараа за евентуално реализирање заеднички проекти. Од досегашната соработка, рекоа, не се задоволни. „Размената е на многу ниско ниво, околу 60 милиони долари се извозуваат од Македонија за Албанија. Во делот на инвестициите оваа сума е многу поголема, кај нас албанските достигнуваат 103 милиони долари, а нашите во Албанија се сведени само на 2,4 милиони долари“, изјави Блерим Златку, претседател на Стопанскат�� комора на северозападна Македонија. (Ек.Р.)