Бугарија и Украина се главни извори за шверцот со луѓе во Европа
Вашингтон - Украина и Бугарија се главните извори за шверцот на луѓе во Европа, пишува денеска американското списание „Форбс“ во текстот за организираниот криминал во Европа, насловен како „ Европските престолнини на криминалот“.
Според списанието, кое се повикува на податоци на европската статистичка служба Еуростат и на полициската служба на ЕУ - Еуропол, Чешка најчесто служи за транзитна земја, а главни дестинации се Германија, Холандија и Велика Британија.
Шверцот со луѓе, присилени принудно да работат, е во пораст, а наедно е и многу тежок за оценување на проблемот. „Форбс“ предупредува дека ЕУ треба да измине долг пат за да го реши проблемот со организираниот криминал, кој во голем дел земји дополнително се заостри од корупцијата.
Европа може да биде поделена на четири криминални појаси, објаснува „Форбс“, повикувајќи се на Еуропол. Политички нестабилниот југоисток или Балканот е клучен транзитен пат за шверцот со наркотици и нелегални имигранти. Југозападот или Иберискиот Полуостров е центарот на шверцот со наркотици од Латинска Америка и Северна Африка. Североистокот или скандинавските земји е нешто како крајна дестинација за шверцот со дроги и цигарите. Што се однесува до северозападот, посебно Велика Британија, таму има сериозни проблеми со нелегалната имиграција и е дестинација за шверц со наркотици.
Организираните криминални групи за параван често пати користат легални компании кои вообичаено се занимаваат со транспорт или со увоз и извоз, за преку нив да ги исперат парите или да вложуваат нечисти пари во недвижни имоти. (МИА) |
