Хомеопатијата на испит - лек за спас или чудна водичка

Дебата меѓу лекарите и хомеопатите и натaму се води, зашто научно не е докажано за чудотворната материја

Јасмина Јовановска


Хомеопатијата е лек или обична водичка? Оваа дилема е се' уште присутна кај нас и во светот, а јавната дебата се води посебно меѓу лекарите кои се скептици во овој вид лекување, без конкретна материја.

Лекарите сметаат дека хомеопатските лекови се чиста водичка, а на болните дејствуваат само како плацебо ефект. Поточно, пациентите повеќе психички веруваат дека има лек во водичката. Но, за лекарите тука нема лек. Растворите се толку разредени што нема ниту една видлива мерлива материја, па затоа лекарите прашуваат како тие може да дејствуваат. Хомеопатите, пак, тврдат дека водичката е делотворна и дека таа има доволно материја за да го разбуди организмот, да го поттикне и му даде животна сила за тој да се врати во својата природна рамнотежа, од која излегол поради некоја нарушена состојба.

Поголемиот дел од лекарите и фармаколозите од клиниките кај нас се скептици за хомеопатијата, но немаат храброст јавно да ја критикуваат. Тие одбија јавно да зборуваат за хомеопатијата, со изговор дека не се компетентни за оваа област.

Затоа, пак, странските експерти немаат проблем јавно да кажат. Волфганг Вале, лекар и специјалист за уво, грло и нос од Германија, смета дека хомеопатите се квазилекари, а не медицинари. Спорна тема број еден е дејствувањето на хомеопатските раствори. Колку што е растворот поразреден или, како што вели хомеопатот, попотенциран, би требало и појако да дејствува. Волфганг Вале смета дека тоа е смешно. „Ако некое средство го разредиме до таа мера да нема повеќе молекули, како тогаш дејството може да биде зајакнато? Кога молекулата ја нема, не може ниту да дејствува. Знам дека сега хомеопатот ќе каже - тоа не е разредување, туку потенцирање. Но, потенцирањето може да се примени во математиката, но не и во физиката“, вели Вале.

Но, хомеопатите велат дека сигурно се потребни уште многу истражувања, но нешто е тука и тоа нешто дејствува. Како, тоа е се' уште прашање.

„Дејството на хомеопатскиот лек се' уште не е научно докажано, бидејќи екзактната наука држи до тоа материјата да ја видиш, па за да знаеш дека постои. А хомеопатскиот лек постои, но не го гледаш“, вели Ели Диновска од Центарот за креативно и здраво живеење „Гајатри“. Но, според Диновска, хомеопатијата полека почнува и научно да се докажува. „Европската асоцијација прави банка на успешни случаи, а јапонско истражување докажа дека водата има меморија и полека се согледува хомеопатскиот начин на дејствување“, објаснува Диновска.

Лекувањето, според хомеопатите, е по природен пат. Хомеопатскиот лек ја има информацијата од разредената материја и кога ќе влезе во организмот го стимулира имунолошкиот систем и го тера да се бори со болната состојбата, се' додека не ја постигне природната рамнотежа.

Терапијата е индивидуална, односно уникатна за секое лице или, како што велат хомеопатите - лековите се дизајнирани според мерка на пациентот. „Ако има пет лица со главоболка, сите ќе добијат различни хомеопатски лекови. Притоа, лицето се гледа како целина. Се распрашувам за секој дел од телото, зашто освен на физички нарушената состојба, треба да се дејствува и на емоционалната и на менталната состојбата на телото. А разговорот со лицето, исто така, е лек и можност да се испразни негативната енергија“, смета Диновска, која е хомеопат од 1999 година. За хомеопатијата се заинтересирала поради чести проблеми што ги имала со грлото, кои откако се префрлила на хомеопатската терапија, и' исчезнале.

Но, интересот за хомеопатијата е се' поголем, зашто и резултатите од оваа терапија се поголеми. Бројот на привразниците на овој вид терапија од година на година се зголемува. Во центарот „Гајатри“ поминале лица со најразлични нарушени здравствени состојби - од настинки, главоболки, па до астмтичари, дијабетичари... „Најчесто се обраќаат мајки чии деца често се разболуваат и им здодеало да одат на лекар за настинки и да примаат антибиотици. Чести се јавувањата и од мајки со деца кои се алергични на разни агенси“, вели Диновска.

Но, македонските хомеопати признаваат дека има ситуации кога не може да се исклучи класичната медицина. „Едноставно, класичната медицина и хомеопатијата се надополнуваат. Многу добро би било кога соработката со лекарите би била поголема и би имало разбирање, па со двете терапии ќе има далеку поголеми резултати“, порачуваат хомеопатите во земјава.

Хомеопатот Билјана Ѓуроска, која е и лекар по општа медицина, смета дека полека се пробива мразот кај лекарите за овој вид лекување. „Матичните лекари се тие кои полека сфаќаат дека дејствува хомеопатијата. Кога некој пациент ќе им се врати во ординација со резултати од оваа терапија, тие им велат - одете ако помага“, раскажува д-р Ѓуроска од Македонската школа за хомеопатија, која веќе десет години се занимава со оваа терапија.

А дека помага хомеопатијата, има бројни примери, па дури и случаи кај кои класичната медицина не можела да им помогне.

Мајка на двегодишен син, ��ој имал хронична тромбоцитопенија, или намален број тромбоцити, раскажува дека нејзиното дете со хомеопатија се чувствува многу подобро. Откако му ја откриле случајно болеста, шест месеци го лекувале со кортикостероиди. Додека траела терапијата, имало минимално подобрување, но кога била прекината терапијата, состојбата се влошила, а детето имало само психички и физички промени. „Пребарувајќи на Интернет, ја открив хомеопатијата. Почнавме со оваа терапија, иако бев скептична. Во почетокот на терапијата имаше и влошување на состојбата, па дури и ситуации кога пак завршивме на клиника, поради крвавење од носот кое не прекинуваше. Ни дадоа пак кортико, но одбивме и продолживме со хомеопатски лекови, кои ни беа дадени во центарот на Ели. Бројот на тромбоците почна да се зголемува“, раскажува мајката Д.А., која додава дека одлуката за хомеопатијата била една од најтешките во нејзиниот живот, но потоа сфатила дека правилно постапила. „По точно една година од терапијата, моето дете активно спортува“, вели оваа жена.

Има примери и кога пациенти со хронични заболувања, кога преминале на хомеопатска терапија, се ослободиле од лековите препишани од лекар.

„Астматичар имаше поленска треска и алергија на куќен прав и дерматофагоиди. На почетокот паралелно ја примаше и астматската конвенционална терапија и хомеопатската. Полека почнавме да исклучуваме еден по еден лек од класичната медицина. Сега, по две години, лицето нема поленска треска, но и не прима повеќе антихистаминици и спрејови“, укажува д-р Ѓуроска, која вели дека за секој пациент терапијата трае различно време, а хомеопатскиот лек е еден ист за кое било заболување што го има лицето, зашто се прави врз база на организмот како целина, а не на заболениот орган.

Друга пациентка, пак, вели дека се излекувала од ендометриоза на јајчниците. „Секое добивање менструација имав неверојатни болки и не ми помогнаа хормоните. За хомеопатијата дознав од еден другар. Сега имам деца“, вели триесетгодишната мајка од Скопје, која не сака да го открие идентитетот, но вели дека хомеопатијата и' помага и сега со децата. (J.J.)

Хомеопатите лекуваат и со арсен и морфиум

Хомеопатите лекуваат и со препарати што имаат арсен и морфиум. Но, за разлика од класичните лекови, одредени хомеопатските препарати содржат елементи од растително потекло. Така, за хомеопатски лек што содржи арсеникум е лекот што се користи како терапија за труење со хемиски арсен или, пак, за разни други видови труења, па дури и при повраќање и дијареи предизвикани од стомачни вируси.

Растителен екстракт од морфиум во многу разредена форма се употребува како хомеопатски лек за нарушени психички состојби. Овие лекови покажуваат добри резултати кај претрпен стрес или некој друг вид траума, која останала длабоко во психата на лицето. Со овој препарат психичкиот белег замрзнат со години, велат хомеопатите, се ослободува од телото, за разлика од хемиските препарати што само ги потиснуваат психичките симптоми.

„Содржината на арсеникум или морфиум (опиум) во препаратот е многу мала, речиси и ја нема. Затоа овие лекови не се опасни, туку само може да дејствуваат. Зашто помала концентрација на елементот само повеќе го потенцира дејството“, објаснува д-р Ѓуроска.

Хомеопатските препарати, главно, се изработуваат од минерали, елементи или материи од животинско потекло, од растително потекло, а може да биде дури и секрет од инсект.

Терапијата се базира на принципот дека слично со слично се лекува. Така, на труење со арсен се дава арсен.

Кај нас хомеопатските лекови не се регистрирани. Засега се набавуваат надвор од земјата, од Германија, Бугарија, Индија. Тие чинат од три до најмногу десет евра.

Македонската хомеопатија се сертифицира

Од викендов во Скопје ќе стартува првата школа за интегрирана хомеопатија, која ќе се одржува во Центарот за едукација во Црвен крст. Ова ќе биде прва школа која кандидатите што ќе ја завршат ќе имаат македонски сертификат за хомеопатија. Предавачите се од Германија и Бугарија, а ќе трае три години. „Програмата е таква за немедицински лица паралелно да се изучува медицината и хомеопатијата, зашто без да се знае физиологија и анатомијата на телото, не може да се биде и хомеопат“, истакнува д-р Ѓуроска. Според неа, програмата ќе биде изработена од Центарот за едукација на возрасни при Минист��рството за образование, а во преговори се и со Министерството за здравство.