Ќе нема руска зима во Македонија

Најавите на руските метеролози за многу ниски температури и студена зима, не важат за Македонија. Напротив, ќе имаме вообичаена зима со просечни температури, но со врнежи што ќе бидат поголеми од просечните од 25 до 50 отсто.

Дека температурите нема многу да се разликуваат од досегашните и ќе бидат карактеристични за нашите зими, потврдуваат и од Управата за хидрометеоролошки работи. Кон крајот на есенва и во последните денови од претстојнава зима температурата ќе биде во границите на просечните вредности, велат и анализите на Виртуелниот центар за климатски промени на Југоисточна Европа. Во согласност со овие просечни вредности на температурите во Македонија ќе биде и овој ноември, а тие ќе бидат во интервал меѓу 6 и 8 Целзиусови степени. На планините живата во термометрите ќе се движи меѓу вториот и четвртиот степен. Врнежите во централните подрачја, како и во Скопската Котлина, ќе бидат поголеми од 50 до 75 отсто од просечните вредности.

И декември, според температурите на воздухот, нема да се разликува многу од претходните години. Во најголем дел од земјава тие ќе бидат меѓу два и четири степени, а на планинските места од нула до два. За овој месец има малку поинаква хидролошка карта и се очекува врнежите да бидат помали од просечните од 25 до 50 отсто.

Прогнозите за јануари се за два до четири степени пониски средни температури на воздухот во централна Македонија. Очекуваните температури на воздухот се меѓу минус два и нулата, а во планинските делови и пониски. Од 25 до 50 отсто јануарските врнежи ќе бидат помали од просечните, додека на планините за 25 отсто.

Во најкусиот месец во годината, февруари, средните температури во централна Македонија ќе бидат повисоки од 1 до 3 Целзиусови степени, а во планинските делови ќе се движат меѓу нула и два. За 25 отсто ќе има помалку врнежи, а за исто толкав процент ќе има повеќе на планините. (Сн.К.)