Неодговорноста на Грција скапо ја чини Македонија

Подобро е да имаш одговорни отколку неодговорни соседи, пишува „Вашингтон тајмс“

Во анализата за реномираниот „Вашингтон тајмс“ угледниот економски експерт Ричард Ран го анализира влијанието на грчкиот банкрот врз македонската и бугарската економија. Тој смета дека Македонија го извлекла подебелиот крај во споредба со Бугарија по колапсот на грчката економија. „Подобро е да имаш одговорни отколку неодговорни соседи, без разлика дали станува збор за земја или за сопственик на имот. Македонија и Бугарија се две соседни земји на Грција, чија финансиска криза им предизвика многу непријатности“, пишува Ран во својата анализа.

Тој во економските мерки на Македонија и на Бугарија, ниските даноци и рамниот данок, гледа решение за финансиските кризи во европските држави и во САД. Ран го истакнува и долгогодишното „гледање низ прсти“ на европските финансиски власти во однос на грчкото неконтролирано трошење.

Збунет е што европските држави, како и САД, и покрај финансискиот крах на Грција, се' уште стремат кон високи даноци, кои, на пример, по пакетот мерки со ММФ и со ЕУ во Грција пораснаа на повеќе од 40 отсто. Ран прашува што уште треба да се случи за да се освестат креаторите на политики за да се избегнат идни финансиски падови. „Грција долго беше толерирана од повеќето држави во ЕУ. Нејзините политичари лажеа со години за фискалната состојба на земјата и пред меѓународната заедница претставуваа фалсификувани извештаи. Како резултат на тоа, плаќачите на данок во Европа и оние во САД ќе треба да плаќаат повеќе, а Македонија и Бугарија ќе треба да се соочат со проблеми поради грчката неодговорност“, пишува „Вашингтон тајмс“. Според него, за 12 отсто е намалена трговската размена меѓу Македонија и Грција.

Економскиот експерт Ричард Ран тргнува и од политичките релации меѓу Македонија и Грција и долгогодишниот спор за името, како и грчката блокада на Македонија за членство во НАТО, при што ги сумира бројките за влијанието на грчката криза врз македонската економија.

„Повеќе години откако Македонија објави независност од Југославија во 1991 година, Грција продолжува да ја блокира поради историски настани. Денешната држава Македонија била окупирана од многу народи во последните неколку илјади години. Грците од своја страна се емоционално приврзани кон името Македонија, бидејќи така се вика една од нејзините провинции и покрај тоа што во последните 1.300 години Словените биле население што доминирало на територијата на малата балканска држава. По отцепувањето на Македонија од Југославија, Грците се спротивставија на користењето на тоа име за новата држава и Обединетите нации реши да го користи непријатното име „поранешна југословенска Република Македонија“, кое Македонците продолжуваат да не го прифаќаат. Повеќе земји од светот, вклучувајќи ги САД, ја признаваат Македонија под нејзиното уставно име Република Македонија, но Грците продолжуваат да се спротивставуваат. Така, тие го блокираа процесот за приклучување на Скопје во НАТО и во ЕУ. Спорот за името, сепак, не ги спречи Скопје и Атина да воспостават трговски односи што вклучуваат значителни грчки инвестиции во Македонија. Грците го ставија Скопје во исклучително тешка положба од една страна, бидејќи нема излез на море, а од друга страна, бидејќи нема достапност до ЕУ и до НАТО, а сега грчката криза доведе до големо намалување и на македонскиот извоз за Грција“, наведува весникот. (Од агенциите)