Албанија ќе заработи 15 млн. евра од струјата

Тирана - Албанската електрокорпорација - КЕШ преку тендер договори во јуни да продаде 364.000 мегават-часа, кои целосно ќе бидат наменети за извоз. „Од први до 30 јуни ќе продадеме 363.600 мегавати електрична енергија, по просечна цена од 43 евра за мегават-час, во вредност од 14,8 милиони евра“, соопштија од КЕШ.

Најголемиот дел од енергијата ја купува српската компанија „Руднап“, односно 129.360 мегават-часа, како и швајцарската ЕФТ со 114.960, додека останатото количество енергија ќе ја купат други три компании. КЕШ поминува низ една извонредно поволна хидролошка состојба, што условува максимално производство, а со тоа и максимален извоз. Заклучно со јуни, компанијата очекува да инкасира околу 80 милиони евра од извоз на енергија. (МИА)