Граѓаните збунети од новите сметки

Мајските сметки со предупредување за сите претходно
неплатени долгови

Маја Томиќ


Граѓаните се збунети од последните мајски сметки за струја. Се жалат дека не им се јасни напишаните бројки за потрошените киловат-часови електрична енергија и дека не можат да оценат дали висината на сумата која треба да ја платат е онаа вистинската. Според реакциите на граѓаните, некои треба да ја платат горе-долу истата сума што ја плаќале и во последните неколку месеци од годината, други, пак, се жалат што на сметките им бил внесен и некој долг од пред повеќе години кој веќе го имале платено. Но, најголемиот дел од граѓаните реагираат на висината на сумата, која некаде е и за околу 50 проценти поголема од претходните.

„Ништо не ми е јасно со новите сметки, порано лесно читав колку киловати сум потрошил скапа, колку евтина, колку се другите давачки на основната сума, сега тотално сум збунет. Прво не ми е јасно зошто имам да платам 4.500 денари, кога никогаш толку не сум плаќал за струја. Се' што сфатив е дека за три дена од мај, од 3 до 6, е извршено читање на броилото, што според мене логично значи дека сметката е за потрошената струја во април. А таа сметка сум ја платил веќе“, вели К.М. од Скопје.

Организацијата на потрошувачи на Македонија неодамна ги соопшти собраните поплаки на граѓаните кон „ЕВН Македонија“. Тие се однесуваат на нереално високи сметки, сомневање во исправноста на новите броила кои им регистрирале повисока потрошувачка, на наплатата на застарени долгови за струја, на слабиот квалитет, на недоволните информации од страна на операторите во кол-центрите и на непостоењето двостепени жалбени постапки.

„Според реакциите на одредени граѓаните, излегува дека ЕВН е виновна што информира транспарентно за долговите, а не тие што не плаќале навреме. Сепак, за сите недоразбирања сме отворени 24 часа за наоѓање решение околу сите недоразбирања. Долговите за струја транспарентно се објавени и ако се тужени граѓаните за нив, не застаруваат и треба да ги намират. Најчесто станува збор за тужби по основа на неплатени сметки кои новиот систем ги исфрли во последните сметки“, велат од „ЕВН Македонија“. Посочуваат дека новиот систем за наплата ги регистрира сите детални податоци за корисникот. Велат дека во изминатиот период сториле се' за подобра информираност на граѓаните за новиот лик на мајските сметки и за новиот начин на пресметка. Навреме биле поделени информативните летоци и писма со сите детали околу новините, а секој кој сака што било да праша за сметките или нешто друго, може во секое време да се обрати во кол-центрите.

Од компанијата посочуваат дека за оние што спаѓаат во првата група плаќачи, читањето на броилата било во првата недела од мај и со таа состојба се прави корекција на паушалниот износ на април и може да се случи дека сумата е поголема ако бил повисок и паушалот за април. А сумата за мај е одредена како израмнување на паушалот на струјата кој се одреди во април.

За потсетување, „ЕВН Македонија“ од мај стартуваше со нов систем на пресметка и наплата на потрошената електрична енергија. Во април беа доставени две фактури за струја, за март и за април, која беше паушална, поради преодниот период. „Новиот софтвер-систем е практика секаде во светот и нема да им штети на граѓаните, напротив, тие прецизно ќе знаат кога и колку струја потрошиле“, убедуваа тогаш од ЕВН.

Сите потрошувачи се поделени на четири групи, а броилата се читаат во четири различни термини во текот на месецот. На пример, ако за првата група потрошувачи читањето е од 1 до 3 мај, фактурирањето на сметката до 10., а плаќањето на 25., за третата група се чита од 15. до 21. во месецот, датумот на фактурирање е на 24., а рокот за плаќање до 8. наредниот месец. На четвртата група, пак, броилата им се читаат од 22 до 28, датумот на фактурирање е на 31, а рокот за плаќање до 15. наредниот месец. Се пресметува, поточно чита, потрошувачката на струја во период од точно 30 дена од компанијата велат дека оставаат уште една недела рок за плаќање од претходно утврдениот.