Владата ги визира новините за Антикорупциска

Владата нема намера да се откаже од најавените измени во антикорупциското законодавство, кои предвидуваат професионален статус на членовите, наместо волонтерски и воведување мандат од четири години, наместо пет.

Министерот за правда, Михајло Маневски, вчера потврди дека Владата веќе ги визирала измените на Законот за спречување на корупцијата за кои наскоро треба да се изјасни и Собранието.

„Нова Антикорупциска комисија треба да се избере во рок од една година по стапување во сила на законот“, кусо рече министерот за правда. Иако Маневски избегна прецизен одговор дали актуелниот состав целосно ќе го заврши мандатот што истекува во 2012 година, станува сосема извесно дека членовите ќе бидат предвреме разрешени. Под претпоставка законските решенија да бидат верификувани од пратениците идниот месец, тогаш нова Антикорупциска комисија треба да биде избрана најдоцна до октомври 2011.

Членовите на Државната комисија за спречување на корупцијата остро се спротивставија на предлогот за скратување на мандатот сметајќи го потегот на Владата како класичен упад во нивната работа како контролна институција. Но, го оквалификуваа и како недозволив преседан што би можел да се користи во иднина секогаш и во секое специјализирано тело кога членовите не се по мерка на власта. (К.Ч.)