Борците ќе маршираат на Светскиот ден на мирот

Во организација на Сојузот на борците на град Скопје, в недела со мировен марш ќе биде одбележан 21 Септември - Светски ден на мирот. Секоја година нашава земја се приклучува на светското одбележување на мирот што се одржува под покровителство на Обединетите нации во многу земји низ светот. Под мотото „Ветераните чекорат за мир“, маршот ќе тргне во 11 часот од паркот „Жена-борец“, па се' до Споменикот на ослободителите пред Владата, каде што ќе биде прочитана пораката на генералниот секретар на Обединетите нации, Бан Ки Мун.

„Мирот е една од човековите најдрагоцени потреби. Тој е наедно највозвишената задача на Обединетите нации. Ова работење за мирот не е лесно, но е неопходно. Навистина, во безброј заедници низ светот, мирот претставува недостижна цел. Од камповите за бегалци во Чад и во Дарфуд до патиштата во Багдад, прашањето на мирот е исполнето со препреки и страдања“, се вели во пораката на Бан Ки Мун. За значењето на Светскиот ден на мирот, тој напомнува дека е добра можност да се вложат напори за промоција на мирот и благосостојбата на сите луѓе насекаде.

„На овој меѓународен ден да ветиме дека мирот не е само приоритет, туку и желба. Да се обврземе дека ќе направиме повеќе, каде и да сме и на кој било начин, да го направиме секој ден да биде Ден на мирот“, се вели на крајот од пораката.

Во истиот дух, и претседателот на Сојузот на борците на Скопје, Трајко Стаматоски, рече дека секој што ги почувствувал ужасите на војната знае како треба да се цени мирот. „Мирот е насушна потреба на секој човек и е најголемото богатство на еден народ. Македонија најдобро го знае тоа. Затоа упатуваме повик до сите слободољубиви граѓани да учествуваат и да дадат поддршка на оваа манифестација од светски размери“, рече Стаматоски. За учеството на жените во војните се осврна Олга Божиноска од Градската боречка организација. Таа рече дека почитта спрема жената-борец во Македонија е голема поради нејзиното учество, но и на тоа како таа одговори на задачите во војните. Покани за учество на оваа манифестација се испратени до сите државни институции, организации и здруженија. (Св.У.)