Главната пошта почна повторно да работи



Директорот Рафиз Алити и вработените се вратија на своите работни места во опожарениот објект на „Македонска пошта“

Директорот Рафиз Алити и вработените се вратија на своите работни места во опожарениот објект на „Македонска пошта“ по центарот на Скопје. Девет дена по големиот пожар кој ја зафати поштата, дел од службите се обидуваат да се вратат во нормалното работење, во просториите каде што има услови за тоа.

„Во дел од канцелариите кои се многу зафатени од огнот, допрва ќе се врши расчистување и реновирање“, велат надлежните од „Македонска пошта“. Тие добија рок од Владата за две недели да изготват целосен извештај за работењето на јавното претпријатие, како и да образложат зошто не биле осигурени во случај на пожар. Портпаролката на „Македонска пошта“, Љиндиана Граждани, вели дека тендерот за осигурување на поштата е веќе објавен, а за исходот од него и за мерките што се преземени во претпријатието, јавноста наскоро ќе биде информирана на прес-конференција. Неодамна тие направија и увид во инвентарот и направената штета, а во јавноста беше соопштено и дека изгореле и околу 3.000 евра во пожарот.

Извештај до Владата за 15 дена треба да достават и МВР, каде што се' уште е во тек вештачењето за причините за настанатиот пожар, потоа Министерството за транспорт и врски, Министерството за култура и надлежните институции кои треба да направат увид за штетата што е нанесена на муралот на Борко Лазески, кој се наоѓа во фоајето на зградата. Збирната информација ќе биде разгледана на Владата, по што се очекува да бидат донесени заклучоци. Се' уште е неизвесно дали ќе се бара одговорност од првиот човек на „Пошта“, Рафиз Алити од редовите на Демократската унија за интеграција, кој тендерот за осигурување го распиша неколку дена откако се случи пожарот.

„Македонска пошта“ во тендерот бара полисата да важи ретроактивно, односно избраната компанија да ја покрие веќе настаната штета, која се' уште не е проценета. Се' уште е неизвесно дали некоја од осигурителните компании ќе прифати ваков договор.

Во огнената стихија целосно изгоре покривот, шалтер-салата и неколку канцеларии на вториот кат од зградата. Уништено е и приземјето на зградата, каде што се наоѓаа вредни уметнички слики. Речиси десетина дена вработените беа евакуирани од зградата и привремено работеа во просториите на „Македонска пошта“ лоцирани кај Железничката станица во Скопје. (Д.Т.)