Овчарот Иснифарис Џемаили повторно зад решетки



Овчарот од аферата „Бачило“ пред една година излегол од Идризово за да се лекува, но повеќе не се вратил во затворот

Љубиша Станковиќ

Наjпознатиот овчар Иснифарис Џемаили е повторно зад решетки откако една година беше на слобода, за да се лекува. Полициските „Алфи“ денеска го привеле овчарот од аферата „Бачило“ на булеварот „Митрополит Теодосиј Гологанов“.

Шеесет и шестгодишниот Џемаили (66) повеќе од една година не се појавил во затвор, поради наводно лекување, поради што судот издал наредба за негово приведување. Тој треба да одлежи затворска казна од 3,6 години за криминалот со наплата на обесштетување од државата во в��сина од 720 илјади евра за наводно гранатирано бачило во 2001 година.

Од МВР потврдуваат дека Џемаили своето напуштањето на затворот „Идризово“ требало да го оправда уште на 10 минатиот месец, но тој тоа не го сторил и за него судот издал наредба за негово пронаоѓање. Иснифарис, поради нарушено здравје, со судска одлука, прв пат бил пуштен на лекување уште кон крајот на април 2011 година, но бил задолжен да го оправда своето отсуство од казнено-поправната установа. Крајниот рок со кој Џемаили бил обврзан да се пријави во затворот бил 10 декември 2012 година. Со оглед на тоа што тој не го испочитувал она за што се обврзал, затворот го известил судот, а тој издал налог до МВР за негово пронаоѓање.

Тој е уапсен дваесетина дена од одлуката на Владата да заплени 10 стана и еден деловен простор. Како што тогаш соопшти владиниот портпарол Александар Ѓеорѓиев, Агенцијата за управување со запленет имот ќе располага со 10 стана со површина од 910 квадратни метри и деловен простор од 62 квадратни метри. Владините процени се темелеа на пресметки кои упатуваат на „заработка“ од имотот на Иснифарис, односно дека штетата што тој ја причинил е проценета на 44 милиони денари, а заработката, по продажбата на недвижностите, требало да донесат еден милион евра.

Со заплената и продажбата на становите и на деловниот простор државата планираше да се обесштети, бидејќи Иснифарис Џемаили со начинот на којшто работел, односно со фиктивните договори за заем и со лажните хипотеки ја оштетил државата за милионски износи.

„По седум години од отворањето на аферата ’Бачило’ и седум години како Иснифарис Џемаили се обидува да ја избегне правдата, со пресудата на Апелацискиот суд во Скопје сите фиктивни договори за заем и хипотеките стануваат ништовни“, изјави владиниот портпарол, Александар Ѓорѓиев. Средствата што ќе се обезбедат од продажбата на недвижностите ќе се пренасочат за плати, пензии, субвенции и други државни трошоци. Иако оттогаш минаа повеќе од три недели, Владата се' уште не соопштила дали имотот или дел од него е продаден.

Овчарот Иснифарис Џемаили стана познат во јавноста по неговото апсење во 2006 година. Тој се товареше дека помогнат од нотарот Никола Стоименовиќ ја оштетил државата за 44.462.585 денари со тоа што извршил наплата на штета по основ на убиена и повредена стока. Џемаили примил судска пресуда со која нему му било одобрено да наплати милионска штета по наводно хеликоптерско ракетирање, извршено на 27 јуни 2001 година, на неговото бачило во близина на тетовското село Камењане. Со ветеринарни потврди требало да се докаже дека во нападот на бачилото биле убиени 2.150 овци, 17 крави, 13 телиња и 22 коња. По ова следело и дополнување за уште 3.820 овци, 15 крави и исто толку телиња и 27 коњи.

Со судска пресуда Џемаили, за дела перење пари и за злоупотреба на службена положба и овластување, првично беше осуден на 4,6 години затвор, но тој продолжил да става имот под хипотека.